नारा लिखल टी-शर्टक कारण बृहस्पति दिन राज्यसभामे संसदक कार्यवाही नहि चलि सकल। राज्यसभामे प्रारंभिक मिनटक कार्यवाहीक बाद नहि त’ कोनो प्रश्न पुछल गेल, नहि कुनु विषय पर सदनमे चर्चा भेल। एहने लोकसभाक हाल रहल। दुनू सदनक कार्यवाही बादमे शुक्रदिन धरि स्थगित क’ देल गेल। डीएमकेक सांसद संसदमे परिसीमनक लगातार विरोध क’ रहल छथि। ई परिसीमन लोकसभाक सीटसभक संदर्भमे अछि।
डीएमकेक सांसदसभ संसदमे एहि पर अपन विरोध प्रकट क’ देलन्हि। सदनक बाहर संसद परिसरमे एहि विषय पर पोस्टर-बैनर संग प्रदर्शन कएल गेल। डीएमके सांसद परिसीमनक संदर्भमे नारा लिखल टी-शर्ट पहिरि कय सदनमे पहुँचलाह। जकरा लेल लोकसभाक अध्यक्ष ओम बिरला कठोर आपत्ति कयलनि आ सदनक कार्यवाही स्थगित कयल गेल।
ई हंगामा संसदमे परिसीमनक मुद्दा पर भेल। सदनमे नारा लिखल टी-शर्ट पहिरबाक लेल आपत्ति जताओल गेल। लोकसभा अध्यक्ष कहलनि जे सदनमे कुनु नारा लिखल आनब ठीक नहि अछि। एहेन टी-शर्ट पहिरिकए सदनमे प्रवेश ठीक नहि अछि। लोकसभा आ राज्यसभा दुनू सदनमे कार्यवाही शुरू भेलाक किछु समय बाद स्थगित कएल गेल। राज्यसभामे सदनक कार्यवाहीक 12 बजे धरि स्थगित कएल गेल। कार्यवाही स्थगित करैत राज्यसभाक सभापति जगदीप धनखड़ कहलनि जे ओ सदनक सभ फ्लोर लीडर्स संग चर्चा करताह, तखनि फेरसँ सदन प्रारंभ होयत मुदा पुनः सदन केर कार्यवाही स्थगित कएल गेल।
ओहि ठाम, लोकसभामे सेहो एहने स्थिति रहल। सदनमे तमिलनाडुक सांसद परिसीमनक मुद्दा पर विरोध जताबय लेल नारा लिखल टी-शर्ट पहिरिकए आयलाह। एहि पर स्पीकर ओम बिरला नाराजगी व्यक्त कयलनि। ओ सदनक कार्यवाहीकेँ एक बेर फेर स्थगित कए देलनि।
दोसर दिसि 12.15 बजे राज्यसभाक कार्यवाही प्रारंभ भेल आ बादमे 2 बजे धरि स्थगित कएल गेल। 2 बजे राज्यसभाक कार्यवाही प्रारंभ भेल त’ एकरा पुनः शुक्रदिन धरि स्थगित कएल गेल। एहि दौरान राज्यसभामे नहि त’ शून्य काल भेल आ नहि प्रश्न काल। एकर आलावा राज्यसभामे गृह मंत्रालयक काज पर चर्चा सेहो होयबाक छल। एहीमे आंतरिक सुरक्षा समेत गृह मंत्रालयक अन्तर्गत अयबाक विभिन्न विभाग पर चर्चा होयब छल। चर्चाक अंतमे गृहमंत्री अमित शाहकेँ जवाब देबाक छल। मुदा, सदनक कार्यवाही स्थगित भ’ जेबाक कारण चर्चा नहि भ’ सकल।
