महाशिवरात्रिक अवसर पर शहरी आ ग्रामीण क्षेत्रक सब शिव मंदिरमे पूजाक लेल दिन भरि श्रद्धालुक भारी भीड़ लागल रहल। भोरेसँ सब शिव मंदिर परिसरमे ॐ नमः शिवाय आ हर हर महादेवक नारासँ गुंजायमान भऽ रहल छल। शिव मंदिरमे भक्तक भीड़ जुटय लागल। शहरी आ ग्रामीण क्षेत्रक शिव मंदिरमे भक्तक जुटान संग मेला सेहो देखल गेल। सब मंदिरक बाहर छोट-छोट दोकान सब सजल छल, सब शिव मंदिरकेँ आकर्षक रंगसँ रंगल आ साफ-सफाई आ फूलसँ सुंदरसँ सजाओल गेल छल। साँझमे पीडब्ल्यू केर बाबा नर्मदेश्वर नाथ महादेव मंदिरमे स्थित शिव मंदिरसँ भोले बाबाक बराती आ आकर्षक शोभायात्रा निकालल गेल। जाहिमे भूत,प्रेत, बानर केर मुखौटा पहिरने बच्चा सब नाचैत-गाबैत, युवा सब ट्रैक्टर, पालकी आ बैलगाड़ीमे शहरक भ्रमण कयलक। बाबा भोले केर जुलूस देखय लेल मंदिरमे आओर सड़क पर लोकक भीड़ छल। रातिमे ओतय शिव पार्वती विवाहक आयोजन भेल। फागुन मासक कृष्ण पक्षक चतुर्दशी दिन भक्त पूर्ण श्रद्धा आ भक्तिक संग महाशिवरात्रि मनाबैत छथि। शहरी क्षेत्रमे मत्स्यगंधा स्थित महादेव मंदिर, गायत्री शक्तिपीठ मंदिर, शंकर चौक शिव मंदिर, महावीर चौक शिव मंदिर, राम जानकी ठाकुरबारी शिव मंदिर, कोसी चौक शिव मंदिर, मानस मंदिर, मनोहर स्कूल गेट स्थित शिव मंदिरक भक्त, पुरुष, महिला आ बच्चा सब भोरसँ जेल गेट पर स्थित शिव मंदिर आ नया बाजारमे स्थित शिव मंदिरमे शिवलिंगक पूजा जारी रखलक। महाशिवरात्रिक अवसर पर शिव मंदिरमे लगातार भजन, कीर्तन, अष्टजाम आ नवाहक कारण पूरा वातावरण भक्तिसँ भरल छल। मंदिरक बाहर शकरकंद, गाजर, भांग, धतुरा, फूल, बेलपत्र आ नारियल प्रचुर मात्रामे बिका रहल छल। पंडित कामेश्वर झा, पंडित रविन्द्र झा कहलनि जे शुक्र दिन शिवरात्रि रहलाक कारण सर्वाथ सिद्धियोगक निर्माण भेल अछि। एहि दिन पूजा कयलासँ सुख, समृद्धि आ स्वास्थ्य भेटैत अछि।ओ कहलनि जे भगवान भोलेनाथ आ माता पार्वतीक विवाह फाल्गुन मासक कृष्ण पक्षक चतुर्दशी तिथि केर भेल छल। जकर कारण महाशिवरात्रिक पर्व मनाओल जाइत अछि। सब शिव मंदिरमे भगवान शिव आ पार्वतीक विवाहक आयोजन रातिमे धूमधामसँ कयल गेल। शहरक शंकर चौक शिव मंदिर, नया बाजार पीडब्ल्यूडीमे स्थित नर्मदेश्वर नाथ महादेव मंदिर, पुलिस लाइन आ बाबा सुरेश्वरसँ शिव शोभायात्राक आयोजन कयल गेेल। मंदिर समिति सहित जिला प्रशासन द्वारा बेहतर व्यवस्था कयल गेल जे भक्त सब केर पूजामे कोनो तरहक दिक्कत नै होबय। परिवहनमे सहजता सुनिश्चित करबाक लेल मंदिरक चारूकात उचित यातायातक व्यवस्था कयल गेल । जकर कारण जाम केर स्थिति नहिं बनल। शहरक मुख्य मंदिर शंकर चौक पर भोरहिसँ हजारों महिला पुरुष आ महिला पहुँचय लगलैथ जे देर साँझ धरि चलैत रहल । मंदिरक कार्यकर्ता द्वारा भक्त लोकनिकेँ सब तरहक सुविधा उपलब्ध कराओल जा रहल छल। मंदिरक पूरा परिसर सुगंधित फूलक मालासँ सजाओल गेल छल। जे मंदिरक भव्यता दऽ रहल छल। रंग बिरंगक फूल, रंग-बिरंग बल्ब आ फूलक मालासँ सजाओल गेल मंदिर श्रद्धा आ आकर्षणक केंद्र बनल रहल।
