लोकसभा आ विधानसभा चुनावक तैयारीमे सांसद एखनहिंसँ जुटि जाइथ – अमित शाह

अमित शाह कयलनि बिहारमे महत्वपूर्ण बैसार

*

पटना

*

गृह मंत्री अमित शाह सोमदिन बिहारमे ‘मिशन बीजेपी’ केर लेल डिनर मीटिंग कयलनि। बैसारमे बिहार भाजपा अध्यक्ष आ बिहार विधानसभामे प्रतिपक्षक नेता सेहो उपस्थित छलाह। ई बैसार लगभग डेढ़ घंटा धरि चलल।

बैसारक दौरान अमित शाह लोकसभा चुनावक तैयारीक विषयमे भाजपा सांसदसँ फीडबैक लेलनि। संगहि बैसारमे प्रदेश अध्यक्ष सम्राट चौधरी द्वारा संगठनात्मक तैयारीक प्रतिक्रिया देल गेल। अमित शाह सांसदसभसँ कहलनि जे सांसदसभकेँ एखनहिंसँ लोकसभा आ विधानसभा चुनावक तैयारी शुरू कय देबाक चाही।

ओ कहलनि जे २०२४ केर लोकसभा चुनाव आ २०२५ केर विधानसभा चुनावक तैयारीकेँ एक सङ्ग जोड़ू। अर्थात लोकसभा आ विधानसभा दुनू चुनावक तैयारी एक सङ्ग करू। सांसदकेँ विकसित भारत संकल्प यात्रामे दुगुना मेहनत करु आ संसदक वर्तमान सत्र समाप्त होइते, अपन-अपन क्षेत्रमे एहि यात्रासँ जुड़ू, लोकसभकेँ जोड़ू आ अपन मेहनति बढ़ाउ।

संगहि, योजनाक लाभार्थीसँ संवाद करू आ नव लाभार्थीकेँ जोड़ू।

अमित शाह इहो कहलनि जे ओबीसी आ ईबीसीकेँ भाजपासँ बेसीसँ बेसी जोड़बाक लेल काज होयबाक चाही। विश्वकर्मा योजना, आयुष्मान भारत योजना सन केंद्र सरकारक योजनामे बेसीसँ बेसी लोककेँ जोड़ू। बैसारमे सांसद लोकनि कहलनि जे बिहार सरकार आयुष्मानक आँकड़ा केन्द्र सरकारक संग साझा नहिं कऽ रहल अछि आ सहयोग नहि कऽ रहल अछि। बिहार सरकार विश्वकर्मा योजना लेल सेहो अपन अधिकारी नहिं पठा रहल अछि।