प्रधानमंत्री नरेन्द्र मोदी आइ ४१ हजार करोड़ टाकाक २००० सँ बेसी रेल परियोजनाक उद्घाटन आ शिलान्यास कयलनि। हुनक कार्यक्रममे २०२१ स्थानक ४० लाखसँ बेसी लोक सम्मिलित छलाह। एहि अवसर पर प्रधानमंत्री कहलनि जे आजुक आयोजन नव भारतक नव कार्य संस्कृतिक प्रतीक अछि। भारत जे करैत अछि, ओ अभूतपूर्व गतिसँ करैत अछि। आजुक भारत छोट-छोट सपना देखनाइ बंद कए देलक अछि। आब हम पैघ सपना देखैत छी आ ओकरा पूरा करबाक लेल दिन-राति काज करैत छी।
प्रधानमंत्री कहलनि जे एहि सरकारक तेसर कार्यकाल जूनमे शुरू होबय जा रहल अछि। जाहि गतिसँ काज भेल अछि ओ सबके आश्चर्यचकित कए रहल अछि। ओ जनओलनि जे ५५०सँ बेसी स्टेशनक जीर्णोद्धार कयल गेल अछि। ओ कहलनि जे उत्तर प्रदेशक गोमतीनगरक रेलवे स्टेशन, जकर उद्घाटन भेल अछि, अद्भुत लगैत अछि।
प्रधानमंत्री कहलनि जे किछु दिन पहिने अमृत भारत रेलवे स्टेशन शुरू भेल छल। एहिसँ पता चलैत अछि जे भारतक प्रगतिक रेल कोन गतिसँ आगू बढ़ि रहल अछि।
ओ युवा मित्र सभकेँ बहुत-बहुत बधाई देलनि। प्रधानमंत्री कहलनि “जखन मोदी विकसित भारतक बात करैत अछि तखन एकर सबसँ पैघ लाभार्थी युवा होइत छथि। हम देशक हर युवाकेँ बताबय चाहैत छी जे मोदीक संकल्प अहाँक सपना अछि।”
प्रधानमंत्री कहलनि जे उदाहरणक लेल ओडिशाक बालेसर स्टेशन भगवान जगन्नाथक मन्दिरक विषय पर तैयार कयल गेल अछि। तहिना अमृत भारत स्टेशन लोककेँ ओहि शहरक विशेषताक प्रति जागरूक करत। ओ कहलखिन जे पिछला १० सालमे सब कियो बदलाव देखलक अछि। जाहि सुविधाख लोक कल्पना करैत छल, लोक सोचैत छल जे काश ई भारतोमे होइत, से आइ हम सभ अपन आंखिसँ देखि रहल छी।
वन्दे भारत ट्रेनक कल्पना पर्यंत एक दशक पहिने तक नहिं कयल गेल छल। एक दशक पहिने तक नमो भारत ट्रेनक बारेमे कियो सोचनेहो नहिं छल। एक दशक पहिने धरि कियो स्टेशनमे सफाई सोचैत नहिं छल। एक दशक पहिने धरि लोक सोचैत छलैथ जे हवाई अड्डा सन सुविधा अमीर लोकक लेल होइत अछि। आइ लोक रेलवेमे सेहो ओहने सुविधाक लाभ उठा सकैत छथि। रेलवे, जकरा हरदम घाटामे रहबाक अफसोस छल, आइ बदलि गेल अछि। अर्थव्यवस्थाक मामिलामे आइ भारत ११म स्थानसँ पाँचम स्थानपर आबि गेल अछि। एहि सालक रेल बजट ढाई लाख करोड़सँ बेसी अछि। एहि लेल मोदी भारतकेँ जल्दीसँ जल्दी तेसर सबसँ पैघ अर्थव्यवस्था बनयबामे व्यस्त अछि। ओ कहलनि, एकटा बात ध्यान रखबाक चाही जे नदी, नहरमे कतेक पानि अछि, जँ बाँध टूटल रहत तऽ पानि किसान तक नहिं पहुंचत। तहिना बजट चाहे कतेको पैघ होय, घोटाला होयत तऽ विकास नहिं होयत। ईमानदारीसँ काज भेल अछि। २.५ हजार किलोमीटरसँ बेसी डेडीकेटेड काॅरीडोरक काज भेल। अहां जे टैक्स देलहुँ ओहीसँ काज भऽ रहल अछि।
ओ कहलखिन, “आइ जे लाखो हजार करोड़ रुपयाक निवेश कएल जा रहल अछि ओ रोजगारक गारंटी अछि। हमर रेलवे छोट किसान, छोट कारीगर आ हमर विश्वकर्मा मित्र सभक लेल नव द्वार खोलि रहल अछि। दूध, तरकारी आ फल जल्दी पहुँचि सकैत अछि। आबयवला ५ सालमे जखन एहि सभ स्टेशनक आधुनिकीकरण होयत तखन निवेशक एकटा नव क्रांति आओत।”
