जाहि तरहें बिहारक मुख्यमंत्री नीतीश कुमार फेरसँ इंडिया इंडिया गठबंधनक संयोजक बनबाक चर्चा शुरू भेल अछि, ई साफ अछि जे राष्ट्रीय राजनीतिमे जेडीयू केर दबावक रणनीति सफल भेल अछि। ओना, भले ही राजद आ जेडीयू के नेता नीतीशक बारेमे ‘इंडिया’ मे बैटिंग कऽ रहल छथि, मुदा एहि बातक संभावना कम अछि जे सब दल एकरा लेल तैयार होयत।
यद्यपि इंडिया गठबन्धनक गठनक बादसँ पैघ दलसभकेँ पैघ हृदय देखयबाक चर्चा होइत रहल अछि। छोट-छोट दल सेहो एहि पर दबाव बना रहल अछि। पटनामे भेल पहिल बैसारमे नीतीशकेँ इंडियाक संयोजक बनयबाक चर्चा छल, मुदा दिल्लीक बैसारमे सेहो एकर घोषणा नहिं कयल गेल।
दिल्लीक बैसारमे जाहि तरहें पश्चिम बंगालक मुख्यमंत्री ममता बनर्जी कांग्रेस अध्यक्ष मल्लिकार्जुन खड़गेक नाम प्रधानमंत्रीक उम्मीदवारक रूपमे उठौलनि, जेडीयूक अप्रसन्नताक विषय सेहो सोझाँ आयल। जेडीयू केर नाराजगीक बाद जेडीयू दबावक रणनीति बना लेलक। नीतीश जेडीयूक कमान सम्हारि एकटा पैघ संदेश देलनि। एहिसँ इंडिया गठबंधनक सहयोगी दलकेँ सेहो झटका लागल।
राजदक राष्ट्रीय प्रवक्ता मनोज झा कहैत छथि जे राजद चाहैत अछि जे नीतीश कुमार इंडिया केर संयोजक बनथि। ओना, ओ इहो कहलखिन जे ओहो एहि चर्चा केर सुनबे कयलाह।
एतय जेडीयू नेता एहि पर खुलि कऽ किछु नहिं बाजि रहल छथि। पार्टीक मुख्य राष्ट्रीय प्रवक्ता केसी त्यागी कहलनि जे एहि विषय पर कांग्रेससँ किछु नहिं सुनल गेल अछि। मुदा हम एहन कोनो कदमक स्वागत करब। नीतीश कुमारकेँ संयोजक बनायब नीक विचार अछि, किएक तँ ओ विभिन्न रंग आ आकारक दलकेँ एक मंच पर अनबामे महत्वपूर्ण भूमिका निभौने छथि। एहिमे कोनो सन्देह नहिं अछि जे नीतीश इंडिया गठबंधनक सबसँ पैघ सूत्रधार रहल छथि।
कहल जा रहल अछि जे नीतीशक नाराजगीक बाद सब दल केर एकजुट राखब आसान नहिं होएत। ओना, भाजपाक सुशील मोदी कहैत छथि जे “इंडिया गठबंधनमे संयोजक पद मुंशी पद जकाँ अछि आ एकरा प्राप्त करबाक लेल नीतीश कुमार भाजपाक संग जेबाक डर देखाकए सौदेबाजी कऽ रहल छथि।”
आगा ओ कहलनि जे “प्रधानमंत्रीक उम्मीदवार बनयबाक सभ संभावना समाप्त भेलाक बाद आब ओ संयोजक पदक लॉलीपॉपसँ अपन प्रतिष्ठा बचाबय चाहैत छथि।’
एमहर प्रसिद्ध चुनाव रणनीतिकार प्रशांत किशोर मानैत छथि जे राष्ट्रीय राजनीतिमे जेडीयू केर कोनो महत्व नहिं अछि। ओ कहलनि जे जेडीयूसँ के पूछि रहल अछि, ई अपने मुंह मियां मिट्ठू वाला बात अछि।
ओ कहलनि जे विपक्षक राजनीतिमे सबसँ पैघ दल कांग्रेस अछि, ओ जीतैत अछि वा हारैत अछि ई अलग बात अछि। दोसर टीएमसी आ तेसर डीएमके अछि। जेडीयूसँ के पूछि रहल अछि ?
