नीतीश कुमार विपक्षी गठबंधनक बैसारमे ठुकरौलनि संयोजक पद 

नई दिल्ली

*

बिहारक मुख्यमंत्री आ जदयू नेता नीतीश कुमार विपक्षी गठबन्धनक बैसारमे संयोजक पदकेँ ठुकरा देलनि अछि। ओ कहलनि जे हुनका संयोजक बनबाक कोनो इच्छा नहिं अछि मुदा चाहैत छथि जे जमीनी स्तर पर गठबंधन मजबूत होय। गौरतलब अछि जे विपक्षी गठबंधन (इंडिया एलायंस) केर शीर्ष नेतृत्वक महत्वपूर्ण बैठक चलि रहल अछि। ई बैसार गठबंधनकेँ मजबूत करब, सीट बंटवाराक रणनीति तैयार करब आ गठबंधनक संयोजक बनेबा पर चर्चा करबाक लेल आयोजित कयल जा रहल अछि। ई बैसार वर्चुअल माध्यमसँ आयोजित कैल जा रहल अछि, जाहिमे १० दलक नेता भाग लेलनि। नीतीश कुमार, एमके स्टालिन, शरद पवार, डी राजा, मल्लिकार्जुन खड़गे, उमर अब्दुल्ला, राहुल गांधी, सीताराम येचुरी, लालू यादव-तेजस्वी यादव, अरविंद केजरीवाल, डी राजा, शरद पवार सम्मलित भेलैथ। यद्यपि बैसारसँ पहिने विपक्षकेँ झटका लागल आ पश्चिम बंगालक मुख्यमंत्री ममता बनर्जी एहि बैसारमे भाग नहिं लऽ रहल छथि। संगहि शिवसेना (यूबीटी) नेता उद्धव ठाकरे विपक्षी गठबन्धनक एहि बैसारमे शामिल नहिं भेलाह।

भाजपा सांसद दिलीप घोष विपक्षी गठबंधनक बैसार पर कटाक्ष कयलनि अछि, ओ कहलनि “विपक्षी गठबंधन कोनो काज नहिं करैत अछि, मात्र बैसार करैत अछि। किछु नहिं होएत आ जल्दिये ई गठबंधन टूटि जाएत।”

ममता बनर्जीकेँ बैसारमे शामिल नहिं भेला पर टीएमसी कहलक जे हुनका बैसारक लेल अल्प सूचना पर सूचित कयल गेल छल आ कांग्रेस सेहो बैसारक एजेंडाक बारेमे कोनो जानकारी नहिं देलक। हालक समयमे ई दोसर बेर अछि जखन टीएमसी कांग्रेसक सङ्ग बैसारसँ इनकार कयलक अछि। बृहस्पतिकेँ टीएमसी बंगालमे सीटक बंटवाराकेँ लऽ कऽ कांग्रेसक सङ्ग बैसार करबासँ मना कऽ देने छल। वास्तवमे मीडिया रिपोर्टमे कहल जा रहल अछि जे ममता बनर्जी पश्चिम बंगालमे कांग्रेसकेँ दूटा सीटक पेशकश कऽ रहल छथि आ ओ बेसीसँ बेसी तीनटा सीट स्वीकार कऽ सकैत छथि, मुदा कांग्रेस एहि पर सहमत नहिं अछि।

विपक्षी गठबंधनक संयोजक पद लेल बिहारक मुख्यमंत्री नीतीश कुमारक नाम चर्चामे अछि। जेडीयू चाहैत अछि जे नीतीश कुमारकेँ समन्वयक पदक जिम्मेदारी भेटय कियैक तँ हुनक पहल पर विपक्षी दल एकजुट भऽ गेल। मुदा, ममता बनर्जीक पार्टी द्वारा एकर विरोध सेहो भऽ रहल अछि।