आतंकवादी-गैंगस्टर सांठगांठ मामिलाक संबंधमे एनआईए ४ राज्य – पंजाब, हरियाणा, राजस्थान, मध्य प्रदेश आ केंद्र शासित प्रदेश चंडीगढ़मे ३० स्थानपर व्यापक तलाशी लऽ रहल अछि।
राष्ट्रीय जांच एजेंसी (एनआईए) एक बेर फेर आतंकवादी-गैंगस्टर गठजोड़ मामिलामे पैघ कार्रवाई कयलक अछि। एनआईए मंगलदिन एहि मामिलामे चलि रहल जाञ्चक सिलसिलामे पंजाब, हरियाणा, राजस्थान, मध्य प्रदेश आ चंडीगढ़मे ३० स्थानपर छापा मारलक अछि। आइ भोरसँ एहि स्थानसभ पर छापा मारल जा रहल अछि। एनआईएक कतेको दल सम्बन्धित राज्य पुलिस बलक सङ्ग घनिष्ठ समन्वयमे व्यापक अभियानमे लागल अछि।
एनआईए एहि मामिलामे पहिने गिरफ्तार कयल गेल अभियुक्तसँ पूछताछ कयलाक बाद प्राप्त सूचनाक आधारपर एहि मामिलासँ जुड़ल सन्दिग्धक परिसरमे तलाशी लेलक। केंद्रीय जांच एजेंसीक अनुसार, एनआईए आतंकवादी-गैंगस्टर सांठगांठ मामिलामे व्यापक तलाशी लय रहल अछि।
जनतब जे एजेंसी ६ जनवरीकेँ देशमे आतंकवादी-गैंगस्टर-मादक पदार्थक तस्करीक गठजोड़क पर्दाफाश करबाक लेल एकटा पैघ डेग उठौलक आ खूंखार गैंगस्टर लॉरेंस बिश्नोईक संगठित आतंक-अपराध सिंडिकेटक सदस्यसभक स्वामित्ववला चारिटा सम्पत्ति जब्त कयलक। गैरकानूनी गतिविधि (रोकथाम) अधिनियम, १९६७क प्रावधानक अन्तर्गत हरियाणा, पंजाब आ उत्तर प्रदेशमे एनआईए टीम द्वारा समन्वित छापामारीमे संपत्ति कुर्क कयल गेल।
