खट्टरक इस्तीफाक बाद विधायक दलक बैसारमे भेलाह निर्वाचित नेता
*
चण्डीगढ़
*
हरियाणाक राजनीतिमे पैघ उलटफेर भेल अछि। मनोहर लाल खट्टर द्वारा हरियाणाक मुख्यमंत्रीक पदसँ इस्तीफा देलाक बाद नायब सिंह सैनी हरियाणाक नव मुख्यमन्त्री चुनल गेल छथि।
नायब सिंह सैनीकेँ हालहिमे भाजपाक प्रदेश अध्यक्ष नियुक्त कयल गेल छल। ओ कुरुक्षेत्रसँ सांसद छथि। २००२ मे ओ युवा मोर्चा भाजपा अम्बालासँ जिला महासचिव बनलाह। २००५ मे ओ अम्बालामे भाजपा युवा मोर्चाक जिला अध्यक्ष बनलाह। एकर अतिरिक्त ओ कतेको पद पर रहलाह। २०१४ मे ओ नारायणगढ़ विधानसभासँ विधायक बनलाह। २०१९ मे ओ कुरुक्षेत्रसँ सांसद चुनल गेलाह। एकर बाद केन्द्रीय नेतृत्व हरियाणामे भाजपाकेँ प्रदेश अध्यक्ष बना देलक।
हरियाणामे भाजपा-जेजेपीक बीच गठबंधन सेहो टूटि गेल अछि। एहिसँ पहिने सोमदिन केन्द्रीय गृह मंत्री अमित शाह, भाजपा अध्यक्ष जेपी नड्डा आ हरियाणाक उपमुख्यमंत्री दुष्यंत चौटाला आपसमे भेंट कयलनि।
दरअसल, एकर कारण लोकसभा चुनावक लेल सीट बंटवारा पर गठबंधनमे आम सहमतिक कमी अछि।
गौरतलब अछि जे हरियाणाक उपमुख्यमंत्री आ जेजेपी नेता दुष्यंत चौटाला सोमदिन भाजपाक राष्ट्रीय अध्यक्ष जेपी नड्डासँ भेंट कयलनि आ हरियाणाक १० लोकसभा सीटमेसँ दूटा लोकसभा सीटक माँग कयलनि। २०१९क लोकसभा चुनावमे भाजपा अकेले राज्यक सभटा १० लोकसभा सीटपर जीत हासिल कयने छल।
