प्रधानमंत्री नरेन्द्र मोदी मंगलदिन नेताजी सुभाष चन्द्र बोसक जयन्ती पर हुनका श्रद्धांजलि अर्पित करैत कहलनि जे “देशक स्वतन्त्रताक प्रति हुनक अटूट समर्पण प्रेरणा दैत रहत।”
एक्स पर एकटा पोस्टमे मोदी कहलनि : “पराक्रम दिवस पर भारतक जनताकेँ शुभकामना। आइ हुनक जयन्ती पर हम नेताजी सुभाष चन्द्र बोसक जीवन आ साहसक सम्मान करैत छी।”
प्रधानमंत्री कहलनि “हमर देशक स्वतंत्रताक प्रति हुनकर अटूट समर्पण प्रेरणा दैत अछि।”
सर्व विदित अछि जे सुभाष चन्द्र बोसक जन्म २३ जनवरी १८९७ केँ भेल छल। नेताजीक नामसँ प्रसिद्ध बोस भारतक स्वतन्त्रता सङ्ग्रामक अग्रणी आ सबसँ पैघ नेता छलाह। द्वितीय विश्वयुद्धक अवधिमे अङ्ग्रेजक विरुद्ध लड़बाक लेल ओ आजाद हिन्द फौजक गठन कयलनि।
हुनका द्वारा देल गेल नारा “जय हिन्द” भारतक राष्ट्रीय नारा बनि गेल अछि। क्रांतिकारी नारा “तुम मुझे खून दो मै तुझे आजादी दूंगा” सेहो वैऽह देने छलथि, जे ओहि समय अत्यधिक प्रचलनमे छल।
