कतेको जायरीनकेँ वर्ष २०२४ मे भेटत हज यात्रा करबाक अवसर
*
नई दिल्ली
*
भारत आ सऊदी अरब रविदिन एकटा द्विपक्षीय समझौतापर हस्ताक्षर कयलक जाहि अन्तर्गत नई दिल्लीकेँ २०२४मे वार्षिक हज यात्राक लेल १,७५,०२५ तीर्थयात्रीक कोटा आवंटित कयल गेल अछि। अल्पसंख्यक मामिलाक मंत्री स्मृति ईरानी विदेश राज्य मंत्री वी मुरलीधरनक सङ्ग जेद्दामे सऊदी हज आ उमरा मंत्री डॉ. तौफिक बिन फौजानक सङ्ग द्विपक्षीय हज समझौता २०२४पर हस्ताक्षर कयलनि। एकटा आधिकारिक वक्तव्यक अनुसार, भारतसँ हज २०२४ लेल कुल १,७५,०२५ श्रद्धालुक लेल कोटा निर्धारित कयल गेल अछि, जाहिमे हज समितिक माध्यमसँ तीर्थयात्रीसभक लेल १,४०,०२० सीट आरक्षित कयल गेल अछि जखन कि ३५,००५ हज यात्री निजी ऑपरेटरक माध्यमसँ हज पर आबि सकैत छथि।
ईरानी ई जानकारी ‘एक्स’ पर एकटा पोस्टक माध्यमसँ देलनि। ओ हज सम्मेलनमे भाग लेबाक लेल आ भारत आ सऊदी अरबक बीच हज समझौता २०२४पर हस्ताक्षर करबाक लेल दू दिवसीय यात्रापर रविदिन दुबई पहुँचलीह। राजदूत डॉ. सुहेल खान, महावाणिज्यदूत मोहम्मद शाहिद आ सऊदी अरबक हज आ उमरा मंत्रालयक अधिकारी जेद्दा हवाई अड्डा पर ईरानीक अगुवाई कयलनि।
जेद्दामे भारतक महावाणिज्य दूतावास ‘एक्स’ पर कहलक, “अल्पसंख्यक मामिलाक मंत्री स्मृति ईरानी हज सम्मेलनमे भाग लेबाक लेल आ द्विपक्षीय हज समझौतापर हस्ताक्षर करबाक लेल जेद्दा पहुँचल छथि।”
ईरानी सऊदी अरबक हज आ उमरा मामिलाक मंत्री तौफीक बिन फौजान अल राबियाक सङ्ग द्विपक्षीय बैसार सेहो करतीह, आ आगामी हज यात्रासँ जुड़ल आपसी हितक मुद्दापर चर्चा करतीह। ओ सोमदिन जेद्दामे सऊदी हज आ उमरा मामिलाक मंत्रालय द्वारा आयोजित ‘हज आ उमरा सम्मेलन’क तेसर संस्करणक उद्घाटन समारोहमे सेहो भाग लेतीह।
