मिथिला क्षेत्रीय बिहारक दरभंगाक सुशांत आइपीएलमे अनुबंधित भेलाह २•२० करोड़मे

सुशांतक पिता समीर मिश्र छथि मिथिलाक्षर साक्षरता अभियानी

*

दरभंगा समदिया

*

सुशांत मिश्राकेँ आइपीएल क्रिकेटमे गुजरात टाइटंस बेस प्राइससँ एग्यारह गुणा महंग बोली लगा कय अनुबंधित कयलक अछि। ई बिहारक मिथिला क्षेत्रीय दरभंगा जिलाक तुमोल गामक छथि। सुशांतक पिता समीर मिश्र प्रायः चालीस सालसँ रांचीमे रहि रहल छथि एवं ओतय वेटनरी सेल्समैनक रुपमे कार्यरत छथि, संगहि संग मिथिलाक्षर साक्षरता अभियानक ६८म बैचक संरक्षक अभियानी छथि।

सुशांत पढ़ाई केर संग-संग झारखंडक घरेलू टीममे २०२१ मे डेब्यू कयलनि आ २०२२ मे रणजी ट्रॉफीमे शानदार प्रदर्शन कयलनि। सुशांत मिश्राकेँ एखनि आइपीएल २०२४ केर लेल गुजरात टाइटंस बेस प्राइस बीस लाखक एग्यारह गुणा अधिक दऽ दू करोड़ बीस लाखमे अनुबंधित कयलक अछि।

एकर बाद हुनक पूरा तुमौल गाममे, बल्कि मिथिला-बिहार समेत झारखंडमे उत्सवक माहौल अछि। जहिना ई सूचना भेटल, हुनका बधाई देबाक सिलसिला हुनक घर पर जारी अछि। मिथिलाक्षर साक्षरता अभियानक संस्थापक अजय नाथ झा शास्त्री हुनक पिता समीर मिश्रकेँ सुशांतक एहि उपलब्धिक लेल अनंत अभिनंदन ज्ञापित करैत कहलनि जे “सुशांत मिथिलाकेँ प्रकाशित कयलनि।” वास्तवमे आईपीएल २०२४क लेल मंगलदिन दुबईक कोका-कोला एरिनामे खेलाड़ीसभक नीलामीक लेल बोली लगाओल गेल छल, जाहिमे सुशांत मिश्राक चयन कयल गेल छल। सुशांतक बेस प्राइस २० लाख छल, जे ११ गुणा अधिक दय गुजरात टाइटंस अनुबंधित कयलक। सुशांत मिश्रा तेज गेंदबाजीक लेल जानल जाइत छथि आ बामा हाथसँ बल्लेबाजी सेहो करैत छथि।

सुशान्त मिश्रक दादा कृष्णदेव मिश्र बतौलनि जे सुशांत ५ वर्षक आयु धरि गाममे रहैत छलाह। एकर बाद ओ अपन पिता समीर मिश्रक सङ्ग राँची चलि गेलाह। सुशांत राँचीसँ पढ़लनि। ओ बतौलनि जे सुशान्त बचपनसँ क्रिकेटक शौकीन छलाह, घरसँ डाँट पड़लाक बादो खेलैत छलाह। संगहि ओ अध्ययनमे सेहो प्रतिभाशाली छलाह, हरदम नीक अंक सङ्ग उत्तीर्ण भेलाह। हमरसभक विरोधक बावजूद ओ क्रिकेटक कोचिंग कयलनि आ आइ एहि स्तर पर पहुँचि गेलाह। सुशांतक दादी सेहो अपन पोताक सफलतासँ बहुत खुश छथि। ओ बतौलनि जे जखनि ओ गाममे अबैत छलाह तखन बैट-बाॅल किनबाक जिद करैत छलाह।

सुशान्त मिश्रक जन्म २३ दिसम्बर २००० केँ राँचीमे भेल छल, हुनक बचपन गाममे बीतल। ५ वर्षक आयुमे सुशांत अपन माता-पिताक सङ्ग झारखण्डक राजधानी रांची चलि गेलाह। सुशांतक पिता समीर मिश्र पिछला ४० सालसँ राँचीमे रहि रहल छथि आ ओतय वेटनरी सेल्समैनक रूपमे काज करैत छथि। सुशान्त २०२१ मे अध्ययनक सङ्ग झारखण्डक घरेलू टीममे पदार्पण कयलनि आ २०२२ मे रणजी ट्रॉफीमे नीक प्रदर्शन कयलनि। हुनका आईपीएल २०२२ मे हैदराबादक लेल चुनल गेल छल आ ओ भारतीय अंडर-१९ टीमक हिस्सा सेहो रहि चुकल छथि। २३ वर्षीय सुशांत झारखंडसँ क्रिकेट खेलैत छथि। वर्तमानमे सुशांत एहि खेलक कारण रेलवेमे काज कऽ रहल छथि।