जिला कांग्रेस कार्यालय ललित भवन मधुबनीमे जिला अध्यक्ष मनोज कुमार मिश्रक अध्यक्षतामे वृहस्पति दिन स्वतंत्रता सेनानी बिहार विधान सभाक पूर्व अध्यक्ष सह पूर्व केंद्रीय मंत्री पं. हरिनाथ मिश्रक जयंती पार्टी नेता आर कार्यकर्ता सभ भव्यतासँ हुनका तैल चित्र पर पुष्प माल्यार्पण कय श्रद्धा सुमन अर्पित करैत मनौलैन्ह। एहि अवसर पर पार्टी कार्यकर्ता सभकेँ संबोधित करैत पूर्व केंद्रीय गृह राज्य मंत्री डॉक्टर शकील अहमद कहलैन्ह जे पंडित हरिनाथ मिश्र स्वतंत्रता सेनानी तऽ छलैथे, विधान सभा अध्यक्षक सङ्ग-सङ्ग बिहार सरकारमे कैबिनेट मंत्री आ केंद्रमे सेहो मंत्री रहल छलथि। दरभंगा मेडिकल कॉलेजक स्थापनामे हुनकर अहम योगदान छल। ललित नारायण मिथिला विश्वविद्यालय बनाबयमे सेहो हुनकर सराहनीय योगदान रहल। मिथिलाक राजनीतिमे हुनकर योगदान आर सामाजिक सेवाकेँ हम सभ कहियो बिसरि नहिँ सकैत छी। ओतहि बिहार सरकारक पूर्व मंत्री कृपा नाथ पाठक हुनकर व्यक्तित्व आर कृतित्व पर विस्तारसँ प्रकाश डाललैन्ह। जखनि कि पूर्व विधायक भावना झा कहली जे पं. हरिनाथ बाबू मिथिला क्षेत्र लेल अपन राजनीतिक जीवनकेँ समर्पित कय देने रहैथ। धन्यवाद ज्ञापन पूर्व जिला अध्यक्ष प्रो. शीतलांबर केलैन्ह। जखनि कि कार्यक्रम केर मुख्य रूपसँ पूर्व जिला परिषद अध्यक्ष सह जिला कांग्रेस अध्यक्ष सतीशचंद्र मिश्र, जिला परिषद सदस्य दीपक सिंह, हिमांशू कुमार, कृष्णकुमार मिश्र, रामएकवाल पासवान, कपिलदेव झा, अकिल अंजुम, टेकनाथ पाठक, प्रजापति झा, कृष्णकांत झा गुड्डू, श्यामचंद्र झा, लोकेंद्र पासवान, प्रो. इस्तियाक अहमद, राजीव शेखर, शिवचंद्र झा, आनंद झा, रणधीर सिंह, अजहर खुर्शीद गुड्डू, कौशल किशोर चौधरी सङ्ग दर्जनो पार्टी नेता संबोधित कयलनि। एहि अवसर पर सैकड़ो पार्टी कार्यकर्ता उपस्थित छलैथ।
