मैथिल समन्वय समिति आगामी १४ जनवरी, २०२४ कें अपन स्थापनाक आठम् वार्षिकोत्सव रश्मि-गार्डेन, रामदेव पार्क, मीरा रोड (पूर्व) मे करय जा रहल अछि। आठम् वार्षिकोत्सवक अवसर पर मुंबईक पाँच महत्वपूर्ण जगह पर प्रात:काल ९ बजे सँ २ बजे दिन धरि रक्तदान-शिविरक आयोजन सेहो कयल जा रहल अछि। समिति पिछला वर्ष वार्षिकोत्सवक अवसर पर निर्णय लेने छल जे मिथिला-मैथिली-मैथिलक प्रति अपन अमूल्य योगदानरूपी सेवा समर्पित केनिहार पाँच वरिष्ठ समाजसेवीकें “प्रेरणा-सम्मान” सम्मानोपधि द्वारा सम्मानित करैत आबयवला पीढ़ीक लेल उदाहरण प्रस्तुत करय। ताहि क्रममे विगत् वर्ष पाँच समाजसेवी यथा ज्ञानेश्वर दूबे, जयनारायण झा, भोगेन्द्र झा, यू० एस० झा एवम् मोहन गंगा मिश्रकें सम्मानित कयने छल।
आठम् वार्षिकोत्सवक अवसर पर पुन: पाँच वरिष्ठ समाजसेवी शुभ चन्द्र मिश्र, प्रेम चन्द्र झा (प्रेमजी), पं० देवलोचन चौधरी, डाॅ० गोदावरी झा एवम् उपेन्द्र झाकें “प्रेरणा-सम्मान” सँ सम्मानित कयल जायत। मैथिल समन्वय समिति अपन स्थापनाक उपरांत अनेकों जनकल्याणार्थ सामाजिक कार्यक्रम आयोजित करैत आबि रहल अछि। सामाजिक जीवनमे संगठनक महत्व सर्वोपरि होयत अछि।
मैथिल समन्वय समिति अपन गठनक उद्देश्यक कार्यान्वयनक प्रति कार्यरत अछि। अपन स्थापना कालहिं सँ एक विशाल वटवृक्ष सदृश झमटगर आकारक परिकल्पना करैत सजल-सजाओल टीमक माध्यमें समाजक सभ वर्गक प्रति समदृष्टि रखैत निरंतर अग्रसर अछि। वार्षिकोत्सवक अवसर पर भव्य सांस्कृतिक कार्यक्रम आ प्रीतिभोजक ओरियान अछि। संरक्षक डाॅ० संदीप झाक संरक्षकत्वमे समितिक अध्यक्ष कमल रामविनोद झा (सेठ), सचिव ललित कुमार झा, कोषाध्यक्ष जयमाधव झा समेत समस्त पदाधिकारीगण, वार्षिकोत्सव केर स्मरणीय बनेबाक लेल सक्रिय छथि।
