बिहारमे पछिला कतेको मासमे शराबक तस्करीक कतेको मामिला सामने आयल अछि। संगहि आब अवैध शराब बनाबय वाला माफिया पुलिस पर हमला कयलक अछि। बेगूसराय जिलाक लाखो थाना क्षेत्रमे देशी शराब बनयबामे शामिल लोकक समर्थकक हमलामे एकटा स्थानीय एसएचओ आ एकटा उपनिरीक्षक (एसआई) सहित छओ पुलिसकर्मी घायल भऽ गेलाह।
रविदिन बेगूसराय पुलिस द्वारा जारी एकटा बयानक अनुसार, ई घटना तखन भेल जखन लाखो थानाक एसएचओ अभिषेक कुमारक नेतृत्वमे पुलिसकर्मीक एकटा टीम शनिदिन राति लगभग ११ बजे छापा मारय गेल छल। लाखो थानाक पुलिस कारवाईक लेल बहादुरपुर मुसहरी टोला क्षेत्रमे देशी शराब बनाबयमे शामिल किछु स्थानीय लोकक घर गेल छल।
कहल गेल अनुसार, “जखन पुलिसकर्मी घटनास्थल पर पहुँचलाह तखन अवैध शराब निर्माताक समर्थक पुलिस दल पर पथराव कयलक। एहि घटनामे छओ पुलिसकर्मी घायल भऽ गेलाह।”
घायल पुलिसकर्मीकेँ अस्पतालमे भर्ती कराएल गेल अछि। लगक थानाक पुलिस घटनास्थल पर पहुंचि स्थिति पर काबू पाबि लेलक। घायल पुलिसकर्मीसभकेँ तत्काल नजदीकी अस्पताल लऽ जायल गेल, जतय हुनक स्थिति खतरासँ बाहर कहल जा रहल अछि।
घायल पुलिसकर्मीमे एसएचओ अभिषेक कुमार आ एसआई रविशंकर कुमार शामिल छथि। अधिकारी सभ आन चारि घायल पुलिसकर्मीक नामक खुलासा नहिं कयलनि। पुलिस कहलक जे एहि मामिलामे पाँच गोटे गिरफ्तार कयल गेल अछि आ आगू जाँच चलि रहल अछि।
