बिहारमे लोकसभा चुनावसँ पहिने महागठबंधनमे सीट बंटवाराकेँ लऽ कऽ राजनीति जारी अछि। मुख्यमंत्री नीतीश कुमारक पार्टी जनता दल यूनाइटेड एखनो १७ सीटक माँग पर अडिग अछि। एहि मामिलामे वाम दलक प्रतिक्रिया आयल अछि। वाम दल जेडीयूक १७ सीटक माँगपर आपत्ति जतौलक अछि। ओ कहैत छथि जे बिहारमे १७ लोकसभा सीट पर जेडीयूक कोनो अधिकार नहिं अछि। सीट बंटवाराक सवाल पर उप मुख्यमंत्री तेजस्वी यादव कहलनि कि गठबंधनक बड़का नेता एहि पर फैसला करत। ओ साफ-साफ कहलनि जे मीडियाकेँ सूचना दऽ कऽ सीट नहिं बँटायत।
वाम दलक विधायक रामबली सिंह यादव एहि मामलामे पैघ बयान देलनि अछि। ओ कहलनि जे जेडीयू के १७ लोकसभा सीट पर कोनो अधिकार नहिं अछि। कराकत, आरा, पाटलिपुत्र आ जहानाबादमे हमर स्थिति बहुत मजबूत अछि। हम मांग करैत छी जे हम आगामी लोकसभा चुनावमे ई सीट चाहैत छी।
जहानाबाद आ कराकट सीट पर जेडीयू के कब्जा अछि। जेडीयूक महाबली सिंह कराकट सीटसँ सांसद छथि। जहानाबाद सीटसँ जेडीयूक चंदेश्वर चन्द्रवंशी सांसद छथि। वाम दलक एहि माँगक बाद गठबन्धनक भीतर राजनीतिक हंगामा भऽ गेल।
वाम दलक माँग पर जेडीयूक वरिष्ठ नेता भीष्म सहनी कहलनि जे हम कोनो परिस्थितिमे अपन सीट नहिं छोड़ब। सीट शेयरिंग केर मुद्दा पर वामदल राजदसँ बात करैथ। हम १७ सीटक मांग कए रहल छी। ई एकटा उचित मांग अछि। जेडीयू एहि सीट पर लोकसभा चुनाव जीतलक। एहि लेल हमरा सभकेँ एहि सीट पर अधिकार अछि। एहिमे कोनो संदेह नहिं अछि जे हम एहि बेर सेहो एहि सीट पर चुनाव लड़ब। भीष्म सहनी कहलनि जे २० जनवरीकेँ सभ सीटक फार्मूला सामने आबि जायत। एहिसँ पहिने जदयू विधायक आ बिहारक मंत्री अशोक चौधरी सोशल मीडिया पर कहने छलाह जे इंडिया गठबंधनमे जेडीयूक १७ सीटक दावाक आधार सेहो अछि। पछिला लोकसभा चुनावमे जदयू पार्टी १६ सीट जीतल छल, कुल मिला कए हम १७ सीट पर चुनाव लड़लहुं।
