लालू प्रसाद पटनाक गांधी मैदानमे होबय बला जनविश्वास महारैलीक बारेमे एकटा वीडियो पोस्ट कयलनि आ जनतासँ एहिमे पैघ स्तर पर भाग लेबाक अपील केलथि।
नीतीश कुमारक नेतृत्व वाला जनता दल यूनाइटेड (जेडीयू) केर संग गठबंधन टूटलाक बाद राष्ट्रीय जनता दल (राजद) केर पहिल महारैली आइ रवि कऽ पटनाक गांधी मैदानमे होएत। एहि रैलीक नाम “जन विश्वास महारैली” राखल गेल अछि। पार्टीक तरफसँ एहि विशाल रैली केर पूरा तैयारी कयल गेल अछि। ओतहि लालू प्रसाद सोशल मीडिया प्लेटफॉर्म एक्स पर एकटा वीडियो पोस्ट कयलनि अछि आ लोकसभसँ एहि मेगा रैलीमे अयबाक अपील कयलनि अछि। ओ कहलनि जे लोकसभकेँ एकट्ठा होयबाक चाही आ केन्द्रमे भाजपा सरकारकेँ उखाड़बाक लेल काज करबाक चाही।
जानकारीक अनुसार एहि महारैलीमे कांग्रेस महासचिव राहुल गांधी सेहो उपस्थित रहताह। राहुलक सङ्ग मार्क्सवादी कम्युनिस्ट पार्टी (माकपा)क महासचिव सीताराम येचुरी सहित अन्य नेता सेहो मंच पर उपस्थित रहताह।
लालू प्रसादक छोट बेटा तेजस्वी यादव, जे हुनकर राजनीतिक उत्तराधिकारी मानल जाइत छथि, सेहो रैलीकेँ सम्बोधित करताह। तेजस्वी हालहिमे राहुल गाँधीक नेतृत्ववला भारत जोड़ो न्याय यात्रामे शामिल भेल छलाह।
एहिसँ पहिने अपन जन विश्वास यात्रामे तेजस्वी यादव भाजपा पर भयंकर हमला कयने छलथि। ओ आरोप लगौने छलथि “हम अहाँके कलम पकड़ेबाक काज कऽ रहल छी, मुदा भाजपा तलवार बाँटि रहल अछि आ जहर बाग कऽ रहल अछि। हम एकटा एहन पृष्ठभूमिसँ आबैत छी जतय धर्मकेँ ओकर उचित स्थान देल गेल अछि। हमर घरमे एकटा मन्दिर अछि जतय हम नियमित रूपसँ प्रार्थना करैत छी। मुदा हमसभ इहो जनैत छी जे जँ हम लोकक हितक विरुद्ध काज करब तखन पापसँ मूक्तिक लेल कोनो मन्दिरमे जायब आ पवित्र डुबकी लगेलासँ कोनो लाभ नहिं होयत।”
