बिहारमे बाढ़िसँ लाखो लोकक जीवन अस्त-व्यस्त भऽ गेल अछि। खास कऽ मिथिला क्षेत्रक अनेक जिला अत्यधिक प्रभावित अछि। बाढ़िमे फँसल लोक खाए-पीबाक लेल बहुत चिन्तित छथि। संगहि बाढ़िमे राहत बचावक लेल एनडीआरएफ, एसडीआरएफ आ वायुसेनाक हेलीकॉप्टर तैनात कयल गेल अछि।
बिहारमे बाढ़िक खतरा आइ-काल्हि घटबाक नाम नहिं लऽ रहल अछि। बिहारसँ एकक बाद एक बाढ़िक कारण क्षतिक समाचार सामने आबि रहल अछि। कतहु बाढ़िक कारण भेल कटावक कारण पक्का घर पानिमे ढहि रहल अछि, कतहु लोकक घर आ खेती दुनू पानिमे डूबि गेल अछि। बिहारक कतेको जिलामे बाढ़िक स्थिति आइयो गम्भीर बनल अछि। अतिरिक्त जलक प्रवाहक कारण नदी आ धारा उफान पर अछि। प्रशासन सेहो लगातार राहत कार्यमे लागल अछि।
राज्यक जल संसाधन विभाग बृहस्पतिकेँ जारी एकटा नव बुलेटिनमे कहलक जे कोसी, गंडक, बागमती, महानंदा आ गंगा सहित राज्यक अधिकांश नदीक जलस्तर विभिन्न स्थानपर खतरासँ ऊपर बहि रहल अछि।
गंगा कातक बक्सर, भोजपुर, सारण, वैशाली, पटना, समस्तीपुर, बेगूसराय, लखीसराय, मुंगेर, खगड़िया, भागलपुर आ कटिहारमे गंगाक तट पर स्थित लगभग १२ जिला बाढ़िसँ प्रभावित अछि। संगहि, एखन धरि पाँच गोटेक मृत्यु भऽ चुकल अछि।
गंडक, कोसी, बागमती, महानन्दा आ अन्य नदीमे बाढ़िक कारण पूर्वी चम्पारण, पश्चिम चम्पारण, मुजफ्फरपुर, शिवहर, सीतामढ़ी, अररिया, किशनगंज, कटिहार, पूर्णिया, मधुबनी, दरभंगा, समस्तीपुर, सुपौल, मधेपुरा, सहरसा, गोपालगंज, सारण आ खगड़िया, १८ जिलामे लगभग १६.५ लाख लोक बाढ़िसँ प्रभावित भेल अछि। बाढ़िक कारण लोकक जीवन बाधित भेल अछि।
बाढ़िक कारण जगह-जगह तटबन्ध कटल जा रहल अछि, जाहिसँ लोकक जीवन बेसी कठिनाईक सामना कऽ रहल अछि। बाढ़िक कारण लोकसभकेँ खान-पानक लेल बहुत चिन्ता करय पड़ैत अछि। बिहारमे बरखा नहिं अछि, मुदा एखनो नेपालसँ छोड़ल जा रहल पानिक कारण बिहारक करोड़ो लोक बाढ़िक सामना कऽ रहल छथि। लाखो लोक भागय लेल मजबूर अछि।
राहत बचावमे लागल टीम
बाढ़िक स्थितिकेँ देखैत वायुसेनाक हेलीकॉप्टर पछिला तीन दिनमे सीतामढ़ी आ दरभंगा जिलामे लोकसभकेँ राहत सामग्री उपलब्ध करा रहल अछि। बिहारमे राहत बचावक लेल वायुसेनाक हेलीकॉप्टरक सङ्ग बाढ़िमे फँसल लोकसभकेँ निकालबाक लेल एनडीआरएफक कुल १७ दल आ एसडीआरडीक १९ दल तैनात कयल गेल अछि।
