झारखंडक नव मुख्यमंत्री चंपई सोरेन शपथ लेलाक बाद कहलनि जे हेमंत सोरेनक नेतृत्वमे गठबंधन सरकार एतय आदिवासी आ मूल निवासीक लेल शुरू कैल गेल काज केर गति देत।
ओ कहलनि, “विपक्ष द्वारा कयल गेल झूठ प्रचार आ झारखण्डकेँ अस्थिर करबाक प्रयासकेँ हमर गठबन्धन द्वारा सफल नहिं होबय देल गेल।” भविष्यमे ओ सभ षड्यंत्र केर विफल कऽ देत।
चंपई कहलनि जे हमर सरकार झारखण्डक सभ वर्ग आ समाजक हितक लेल काज करत, जेना हेमंत बाबू करैत छलाह।
सोरेन आदिवासी, दलित, मूलवासीक विकास आ जल, जंगल, जमीनक मुद्दाक प्रति अपन प्रतिबद्धता व्यक्त कयलनि।
शपथ लेबासँ पहिने चम्पई सोरेन झारखंड मुक्ति मोर्चाक प्रमुख शिबू सोरेन आ हुनक पत्नी रूपी सोरेनसँ हुनक निवास पर भेंट कयलनि आ हुनक आशीर्वाद लेलनि।
६८ वर्षीय चम्पई सोरेन हेमंत सोरेन सरकारमे परिवहन मंत्री छलाह। ओ कोल्हान संभागक सरायकेला विधानसभा क्षेत्रसँ विधायक छथि आ हेमन्त सोरेनक सबसँ विश्वसनीय मानल जाइत छथि।
चम्पई झामुमो सुप्रीमो शिबू सोरेनक अनन्य सहयोगी रहल छथि आ झारखण्ड आन्दोलनसँ हुनकर लम्बा जुड़ाव अछि। कतेको बेर मुख्यमंत्री हेमंत सोरेन सेहो हुनक पैर छूबैत देखल गेल छथि। एहिसँ ई अनुमान लगायल जा सकैत अछि जे झामुमोमे हुनक कतेक महत्व अछि।
लोक चम्पई सोरेनकेँ झारखंड टाइगरक नामसँ सेहो पुकारैत छथि। चम्पई पहिल बेर १९९१मे सरायकेला विधानसभा क्षेत्रक उपचुनावमे निर्दलीय उम्मीदवारक रूपमे जीतल छलाह। ओ जीत पैघ छल किएक तँ ओ झामुमो सांसद कृष्णा मार्डीक पत्नीकेँ पराजित कयलनि।
बादमे १९९५मे ओ झामुमोक टिकट पर जीति गेलाह। मुदा २००० मे ओ भाजपाक अनंतराम टुडूसँ हारि गेलाह। एकर बाद ओ २००५ सँ लगातार सरायकेलासँ विधायक छथि। २०१९ मे ओ भाजपाक गणेश महलीकेँ पराजित कयलनि।
चम्पई सोरेनक जन्म १९५६ मे सरायकेलाक जिलिंगगोड़ामे सेमल सोरेन आ माधव सोरेनक घर भेल छल। ओ अपन तीन भाय आ एकटा बहिनमे सबसँ पैघ छथि। शैक्षणिक योग्यताक बात करब तऽ ओ मैट्रिक पास छथि। हुनकर विवाह मानको सोरेनसँ भेल अछि आ हुनका चारिटा बेटा आ तीन बेटी छनि।
