एनटीए केर परीक्षा व्यवस्थाक संपूर्ण ऑडिटक निर्देश, शिक्षा मंत्री लेलनि उच्चस्तरीय समीक्षा बैठक

नई दिल्ली । समदिया

केंद्रीय शिक्षा मंत्री प्रल्हाद जोशी सोमदिन नेशनल टेस्टिंग एजेंसी (एनटीए) केर कामकाज आ हालमे सामने आयल परीक्षा संबंधी समस्याक समीक्षा लेल उच्चस्तरीय बैठक केलनि। बैठकमे मंत्री एनटीए केर परीक्षा प्रक्रियाक संपूर्ण ऑडिट करबाक निर्देश देलनि।

निर्देश देलनि जे परीक्षा व्यवस्थाक प्रत्येक चरणक समीक्षा कऽ कमीक पहिचान कएल जाय आ ओकरा दूर करबाक लेल उठाओल गेल कदमक रिपोर्ट तैयार कएल जाय। ऑडिट पूरा भेलाक बाद सुधारात्मक कार्रवाईक विस्तृत रिपोर्ट शिक्षा मंत्रालयकेँ प्रस्तुत करबाक सेहो निर्देश देल गेल।

शिक्षा मंत्री परीक्षा संबंधी निर्धारित नियम आ प्रोटोकॉलक सख्तीसँ पालन सुनिश्चित करबा पर जोर देलनि। हुनका द्वारा कॉन्फिडेंशियल ऑपरेशन्स आर्किटेक्चर, अलग-अलग कमरा, एयर-गैप्ड सिस्टम आ डिवाइस जमा करबाक नियममे व्यापक परिवर्तन युद्धस्तर पर लागू करबाक निर्देश देल गेल।

यूजीसी-नेटमे तीन विषयक पुनर्परीक्षा

यूजीसी-नेट जून 2026 केर अंग्रेजी, कॉमर्स आ समाजशास्त्र विषयक परीक्षा आब पुनः आयोजित होयत। एनटीए द्वारा एहि तीनू विषयक प्रश्नपत्रमे गंभीर त्रुटि पओलाक बाद पुनर्परीक्षा करबाक निर्णय लेल गेल अछि। प्रश्नपत्रमे भाषा आ वर्तनीक त्रुटिक संग पहिने पूछल गेल प्रश्नक पुनरावृत्ति सेहो पैघ संख्यामे भेटल छल। एहि विषयक पुनर्परीक्षा सितंबरमे आयोजित होयबाक अछि।

बैठकमे प्रश्नपत्र आ अन्य संवेदनशील परीक्षा सामग्रीक सुरक्षा मजबूत करबाक लेल विभिन्न स्तर पर सुरक्षा व्यवस्था कड़ा करबाक निर्णय पर जोर देल गेल। बाहरी नेटवर्कसँ अलग कंप्यूटर प्रणालीक उपयोग कऽ संवेदनशील परीक्षा सामग्री धरि अनधिकृत पहुँच केर संभावना कम करबाक प्रयास कएल जायत।

50 सँ बेसी कर्मचारी हटाओल गेल

अधिकारीसभ शिक्षा मंत्रीकेँ जानकारी देलनि जे एनटीएक सुधार प्रक्रियाक अंतर्गत 50 सँ बेसी कर्मचारीकेँ हटाओल गेल अछि। एकर अतिरिक्त एजेंसीक पेशेवर आ तकनीकी नेतृत्व मजबूत करबाक लेल नव नियुक्तिक प्रक्रिया सेहो शुरू कएल गेल अछि।

एनटीए 10 नव पेशेवर नेतृत्व पद पर भर्ती प्रक्रिया शुरू केने अछि। एहि पदमे मुख्य प्रौद्योगिकी अधिकारी, मुख्य वित्त अधिकारी, मुख्य सूचना सुरक्षा अधिकारी, परीक्षा सुरक्षा महाप्रबंधक, अनुसंधान एवं विकास तथा मनोमितीय मूल्यांकनक महाप्रबंधक सहित अन्य महत्वपूर्ण पद शामिल अछि।

परीक्षा प्रणालीकेँ तकनीकी आ पेशेवर रूपसँ मजबूत करबाक लेल निजी क्षेत्रक विशेषज्ञसभकेँ सेहो एनटीएसँ जोड़ल जा रहल अछि। साइबर सुरक्षा, मनोमितीय मूल्यांकन, प्रश्नपत्र निर्माण आ अन्य तकनीकी क्षेत्रमे एहि विशेषज्ञसभक सेवा लेल जायत।

शिक्षा मंत्री प्रल्हाद जोशी स्पष्ट निर्देश देलनि जे परीक्षासँ जुड़ल सभ स्थापित प्रोटोकॉलक कठोरतासँ पालन सुनिश्चित होए। परीक्षा प्रक्रियाक कोनो स्तर पर लापरवाही नहि होएबाक चाही।