जदयू मंत्री विजय कुमार चौधरी ललन सिंहक त्यागपत्रक चर्चाक कयलनि खंडन

कहलनि अफवाह अछि, ऐहेन कोनो बात नहिं, होयत रणनीतिक बैसार

*

पटना

*

जदयू केर राष्ट्रीय अध्यक्ष ललन सिंहक इस्तीफाक चर्चा मंगल कऽ (२६ दिसंबर) सामने आयल आ राजनीतिक गलियारामे बहुत रास बात होए लागल। मुदा बिहार सरकारक मंत्री जेडीयू केर विजय कुमार चौधरी मीडियामे ललनक इस्तीफाक खबरक खण्डन कयलनि। जदयू मंत्री विजय चौधरी कहलनि जे पार्टी कार्यालयसँ एहन कोनो जानकारी नहिं भेटल अछि आ ने एहन कोनो चर्चा अछि।

विजय कुमार चौधरी मंगल कऽ मीडियासँ बातचीत कऽ रहल छलाह। एहि क्रममे ललन सिंहक इस्तीफाक चर्चा पर सवाल उठाओल गेल। एहि पर विजय चौधरी कहलखिन जे ई एकटा अफवाह अछि। मीडियामे इ खबर चलि रहल अछि। ओ कहलनि “लोकसभा चुनाव नजदीक अछि। बिहारमे सेहो बादमे विधानसभा चुनाव होएत। तकर तैयारी करय पड़तै। रणनीति पर चर्चा करबाक लेल राष्ट्रीय कार्यकारिणी आ राष्ट्रीय परिषदक बैठक २९ दिसंबरकेँ दिल्लीमे होयत।”

विजय चौधरी इहो कहलनि जे “इंडिया गठबंधनमे कतेको दल अछि। सीट बंटवाराक लेल एकटा बैठक आयोजित कएल जा रहल अछि। जेडीयूमे कोनो अंदरूनी कलह नहिं अछि। हम जे कहि रहल छी ओ सही अछि। ओ कहलनि जे गठबंधनमे सीट बंटवाराक मामिला जल्दिये सुलझा लेल जायत।

खबरि अछि जे जेडीयूक राष्ट्रीय अध्यक्ष ललन सिंह अपन पदसँ इस्तीफा दऽ देने छथि। मुदा, हुनकर इस्तीफा एखन धरि स्वीकार नहिं कयल गेल अछि। २९ दिसंबरकेँ दिल्लीमे होबयवला जेडीयूक राष्ट्रीय कार्यकारिणी आ राष्ट्रीय परिषदक बैसारमे एकरा मंजूरी देल जा सकैत अछि। सवाल उठय लागल अछि जे की जेडीयू केर भीतर सबकिछु ठीक नहिं चलि रहल अछि ? मुदा विजय कुमार ललन सिंहक इस्तीफाक खबरक खण्डन कयलनि अछि।