भारतीय नारी शक्तिक आस्ट्रेलिया पर टेस्ट क्रिकेट विजय
मुंबई
*
भारत रविदिन एकमात्र महिला टेस्टक चारिम आ अंतिम दिन ऑस्ट्रेलियाकेँ दोसर पारीमे २६१ रनपर आउट कऽ दू विकेट गमाकऽ ७५ रनक लक्ष्यकेँ प्राप्त कऽ लेलक।
भारत ई मैच आठ विकेट सँ जीतलक। भारत पछिला सप्ताह एकमात्र टेस्टमे इंग्लैंडकेँ ३४७ रनसँ हरा देने छल। ऑस्ट्रेलियाक विरुद्ध भारतीय महिलाक ई पहिल टेस्ट जीत अछि। एहिसँ पहिने दुनू देशक महिला टीमक बीच खेलल गेल १० टेस्टमे भारत चारिटा हारि गेल छल आ छओटा ड्रा भेल छल।
ऑस्ट्रेलिया अपन पहिल पारी पिछला दिनक ५ विकेट पर २३३ रनक स्कोरसँ आगू शुरू कयलक। स्नेह राणा आ राजेश्वरी गायकवाड दू-दू विकेट लेलनि जाहिसँ भारतीय महिला टीम अस्ट्रेलियाकेँ दोसर पारीमे २६१ रन पर समेटि देलक। पुनः ७५ रनक लक्ष्यक १८.४ ओवरमे पीछा करैत ऑस्ट्रेलिया पर पहिल जीत दर्ज कयलक।
स्नेह राणाकेँ मैचमे कुल सात विकेट लेबाक लेल प्लेयर ऑफ द मैचक पुरस्कार भेटलनि। ओ पहिल पारीमे ३/५६ आ दोसर पारीमे ४/६३ लेलनि।
राणा रविदिन भोरमे जे पाँच ओवर गेंदबाजी कयलनि ओहिमे २-६ विकेट लेलनि, जखन कि गायकवाड बिना कोनो रन दय २ विकेट लेलनि जाहिसँ भारत वानखेड़े स्टेडियममे ऑस्ट्रेलियाक अन्तिम पाँच विकेट १५.४ ओवरमे मात्र २८ रन पर खसा देलक।
ऑस्ट्रेलियाक बल्लेबाज भारतीय स्पिनरक विरुद्ध स्वीप करबाक अपन प्रवृत्तिकेँ नियंत्रित नहि कऽ सकल किएक तँ हुनकर १० मेसँ पाँच बल्लेबाज दोसर पारीमे एहि शॉटक शिकार भऽ गेलाह।
लक्ष्यक पीछा करैत भारत पहिल ओवरमे सलामी बल्लेबाज शेफाली वर्माकेँ चारि रन पर गमा देलक। मुदा स्मृति मंधाना छओ चौकाक सहायतासँ नाबाद ३८ रन बना भारतकेँ विजयी गंतव्य धरि पहुँचा देलनि। ओ ऋचा घोषक सङ्ग दोसर विकेटक लेल ५१ रन आ जेमिमा रोड्रिग्सक सङ्ग तेसर विकेटक लेल नाबाद २० रन जोड़लनि। ऋचा घोष १३ आ जेमिमा नाबाद १२ रन बनेलनि।
संक्षिप्त स्कोर: ऑस्ट्रेलिया २१९ आ २६१
भारत ४०६ आ ७५/२
