खेल मंत्रालय डब्ल्यूएफआई केर नव कार्यकारिणी केर कयलक भंग

संजय सिंहक मान्यता कयल गेल रद्द

*

नई दिल्ली

*

डब्ल्यूएफआई केर संबंधमे सरकारक पैघ निर्णय सामने आयल अछि। जानकारीक अनुसार, भारतीय खेल मंत्रालय पहलवानक विरोधक बीच नवनियुक्त भारतीय कुश्ती महासङ्घक नव कार्यकारिणी समितिकेँ निलम्बित कऽ देलक अछि। संजय सिंहकेँ अध्यक्ष बनलाक बाद चर्चित पहलवान साक्षी मलिक एकटा संवाददाता सम्मेलनमे कुश्ती छोड़बाक अपन निर्णयक घोषणा कयलनि। पुनः बजरंग पूनिया पद्मश्री घुरा देलनि। हुनक अतिरिक्त हरियाणाक पैरा-एथलीट वीरेन्द्र सिंह पद्मश्री वापिस करबाक घोषणा कय देने छलाह। खेल मंत्रालय डब्ल्यूएफआई अध्यक्ष संजय सिंह द्वारा लेल गेल सभ निर्णय रोक लगा देलक अछि। खेल मंत्रालय द्वारा अगिला आदेश धरि कोनो तरहक गतिविधि पर पूर्ण प्रतिबन्ध लगयबाक निर्णय लेल गेल अछि।

खेल मंत्रालय अपन निर्देशमे कहलक “डब्ल्यूएफआईक नवनिर्वाचित कार्यकारी निकाय द्वारा लेल गेल निर्णय पूर्णतः नियमक विरुद्ध अछि आ डब्ल्यूएफआई आ राष्ट्रीय खेल विकास संहिताक प्रावधानक उल्लंघन अछि। ई निर्णय नव अध्यक्षक मनमानी देखाबैत अछि, जे सिद्धान्तक विरुद्ध अछि आ पारदर्शितासँ रहित अछि। निष्पक्ष खेल, पारदर्शिता आ जवाबदेही सुनिश्चित करबाक लेल नियमक पालन महत्वपूर्ण अछि। एथलीट, हितधारक, आ जनताक बीच विश्वास बनेनाइ महत्वपूर्ण छैक।”

बृजभूषण सिंहक निकट सहयोगी संजय कुमार सिंह २१ दिसंबरकेँ भेल भारतीय कुश्ती महासङ्घक चुनाव जीतलनि। संजय सिंहक मुकाबला राष्ट्रमण्डल खेलक स्वर्ण पदक विजेता अनिता श्योराणसँ छल। नीता श्योराण महिला पहलवानक यौन उत्पीड़नक मामिलामे बृजभूषण शरण सिंहक विरुद्ध सेहो गवाह छथि। हुनका ओहि पहलवानक समर्थन भेटल जे बृज भूषणक विरुद्ध धरना देलनि। डब्ल्यूएफआई के कुल १५ पद पर चुनाव लड़ल गेल छल। अध्यक्षक पदक अतिरिक्त, वरिष्ठ उपाध्यक्षक ४टा पद, उपाध्यक्ष, महासचिव, कोषाध्यक्षक ४टा पद, संयुक्त सचिवक २टा पद आ ५टा कार्यकारी सदस्यक पद चुनल गेल छल।

चुनाव प्रक्रिया एहि साल जुलाईमे शुरू भेल छल, मुदा अदालती मामिलाक कारण ई चुनाव स्थगित कऽ देल गेल। हालहिमे सर्वोच्च न्यायालय एहि चुनावपर पंजाब आ हरियाणा उच्च न्यायालय द्वारा लगायल गेल प्रतिबन्धकेँ रद्द कऽ देलक आ ओकर बाद चुनावक तारीखक घोषणा कयल गेल।

आब चुनाव २१ दिसम्बरकेँ भेल छल आ एकर परिणाम बृजभूषण खेमाक पक्षमे आयल। अध्यक्ष पदक चुनावमे संजय सिंह अनिता श्योराणकेँ ३३ मतसँ पराजित कयलनि। संजय सिंहकेँ ४० वोट भेटलनि, जखन कि अनिता श्योरन के मात्र ७ टा वोट भेटलनि।

बृजभूषण शरण सिंह पछिला १२ वर्षसँ भारतीय कुश्ती महासङ्घक अध्यक्ष छलाह। ओ २०११ सँ लगातार तीन बेर कुश्ती सङ्घक अध्यक्ष चुनल गेलाह। अध्यक्षक रूपमे बृजभूषण शरण सिंहक कार्यकालमे देशक कतेको पहलवान हुनक विरुद्ध आन्दोलन कयलनि। बृजभूषण शरण सिंह पर महिला पहलवानक यौन उत्पीड़नक आरोप छल।