बिहारक स्कूलमे आब छात्रो हथियार लऽ कऽ जा रहल अछि। आब एहन घटना सामने आबय लागल अछि। हालहिमे हाजीपुर आ सुपौलमे एहन घटना सामने आयल छल। आब बेगूसरायक स्कूलमे सेहो एहने मामिला सामने आयल अछि, जाहिसँ सनसनी पसरि गेल अछि। कक्षा ९ केर एकटा छात्र देसी पिस्तौल लऽ कऽ स्कूल पहुँचल। जखन एकर खुलासा भेल तखन स्कूलमे हलचल मचि गेल। पुलिस सेहो स्कूल पहुँचल आ छात्रकेँ गिरफ्तार कऽ लेलक। हालहिमे सुपौलमे नर्सरी कक्षाक एकटा छात्रकेँ अपन बैगमे हथियार लऽ कs आयल एकटा छात्रकेँ गोली मारि देलक। हाजीपुरमे एकटा छात्रा अपन बैगमे पिस्तौल लऽ कऽ स्कूल पहुँचल। ओ सेहो फायरिंग कऽ देलक। बेगूसरायमे जखन एकटा छात्र अपन संग देशी कट्टा लऽ कऽ स्कूल पहुँचल तखन हड़कंप मचि गेल।
बेगूसरायमे छौड़ाही थाना क्षेत्रक दौलतपुर मालीपुर पथ केर हाई स्कूल छौड़ाही मटिहानी कक्षा 9 केर छात्रक शिक्षक देसी कट्टा संग देखलखिन। एहिसँ छात्रसभमे हड़कंप मचि गेल। सूचना पुलिसकेँ देल गेल । सूचना भेटैत थानाध्यक्ष सह मुख्य प्रशिक्षु डीएसपी सुमित शेखर आ एसआई संजीत कुमार शर्मा शस्त्र बलक संग स्कूल पहुँचलाह आ छात्रकेँ हथियारक संग गिरफ्तार कऽ लेलनि। एसएचओ कहलनि जे छात्रक पहिचान मोहम्मद कमरुलक पुत्र मोहम्मद रहमानक रूपमे भेल अछि जे सहम टोल बखड्डाक निवासी अछि, जे कक्षा ९ केर छात्र अछि। रहमानकेँ कट्टाक संग गिरफ्तार कऽ अग्रेतर करवाई कएल जा रहल अछि।
सुपौलक घटनाक बाद हाजीपुर आ आब बेगूसरायमे हथियार लऽ कऽ स्कूल पहुँचबाक मामिला सामने आयल अछि। बिहारमे कतेको हथियार निर्माणक कारखाना अछि, कतेको धरायल अछि आ कतेको बाँचल अछि, बच्चा-बच्चा लग हथियार खिलौना जँका रहय लागल अछि, ई कतय जा रहल अछि बिहार ?
