हिमाचल प्रदेशमे कांग्रेसकेँ एकटा पैघ राजनीतिक झटका लागल अछि। हिमाचल प्रदेशक कांग्रेसक छओ बागी विधायक शनिदिन भाजपामे शामिल भऽ गेलाह।
कांग्रेसक छओ बागी विधायक सुधीर शर्मा, राजेन्द्र राणा, रवि ठाकुर, इन्द्र दत्त लखनपाल, देवेन्द्र भुट्टो आ चैतन्य शर्मा भाजपा राष्ट्रीय महासचिव अरुण सिंह, केन्द्रीय मंत्री अनुराग ठाकुर, हिमाचल प्रदेशक पूर्व मुख्यमंत्री जयराम ठाकुर, हिमाचल प्रदेश भाजपा अध्यक्ष राजीव बिन्दल आ अन्य नेताक उपस्थितिमे पार्टी मुख्यालयमे भाजपामे शामिल भऽ गेलाह।
केन्द्रीय मंत्री अनुराग ठाकुर कांग्रेससँ भाजपामे शामिल होबयवला एहि सभ नेताक स्वागत करैत कहलनि जे भाजपा मात्र दुनियाक सबसँ पैघ राजनीतिक दल नहिं अछि, बल्कि पार्टीक नेता प्रधानमंत्री नरेन्द्र मोदी दुनियाक सबसँ लोकप्रिय नेता छथि।
मोदी सरकारक उपलब्धि आ गारंटीकेँ उजागर करैत ठाकुर कहलनि जे एहि सभ नेताक पार्टीमे प्रवेशसँ हिमाचल प्रदेशमे भाजपाकेँ आओर मजबूती भेटत। ओ कहलनि जे हिमाचल प्रदेशमे कांग्रेस झूठ वादा कऽ सत्तामे आयल आ राज्यसभा चुनावक दौरान कांग्रेसक एहि छओ विधायकक रूपमे जनताक आक्रोश देखल गेल। ओ कहलनि जे प्रधानमंत्री नरेन्द्र मोदी हिमाचल प्रदेशकेँ अपन दोसर घर मानने छथि आ राज्यक विकासमे कोनो कसरि नहिं छोड़लनि। भाजपाक राष्ट्रीय महासचिव अरुण सिंह एहि नेतासभक स्वागत करैत कहलनि जे कांग्रेसक नीतिसँ परेशान भेलाक बाद ओ सभ इस्तीफा दऽ कऽ भाजपामे शामिल भेल छथि आ पार्टी हुनकर गरिमाक पूरा ख्याल राखत। ओ कहलनि जे एहि नेता लोकनिक भाजपामे शामिल भेलासँ एक दिस राज्यमे भाजपा मजबूत होयत, दोसर दिस राज्यमे कांग्रेसक सफाया भऽ जायत।
