बिहारमे साइबर अपराध पर भारी प्रहार, 507 आरोपी गिरफ्तार

मुख्य सचिवक निर्देश : 1930 हेल्पलाइनक व्यापक प्रचार, एक लाखसँ बेसी ठगीमे e-Zero FIR अनिवार्य

पटना । समदिया

बिहारमे बढ़ैत साइबर अपराध आ डिजिटल अरेस्टक घटनाक गंभीरताक दृष्टिगत राज्य सरकार कठोर रुख अपनौने अछि। मुख्य सचिव प्रत्यय अमृत आ पुलिस महानिदेशक विनय कुमार सभ जिलाधिकारी, वरीय पुलिस अधीक्षक आ पुलिस अधीक्षकक संग वीडियो कॉन्फ्रेंसिंगक माध्यमसँ उच्चस्तरीय समीक्षा बैठक कऽ साइबर अपराध पर प्रभावी नियंत्रण लेल अनेक महत्वपूर्ण निर्देश देलनि।

बैठकमे मुख्य सचिव कहलनि जे वित्तीय साइबर ठगीक शिकार भेल नागरिक तत्काल राष्ट्रीय साइबर हेल्पलाइन 1930 पर शिकायत दर्ज करथि। एहि हेल्पलाइनक व्यापक प्रचार-प्रसार लेल बिजली बिल, मोबाइल भुगतान ऐप, सुधा डेयरीक उत्पाद, सुधा पार्लर, बूथ, नगर निगमक डिजिटल होर्डिंग, एलईडी स्क्रीन आ सार्वजनिक स्थानसभ पर 1930 नंबर प्रमुखतासँ प्रदर्शित करबाक निर्देश देल गेल। स्कूल, कॉलेज आ शिक्षण संस्थानसभमे नियमित रूपसँ ‘साइबर मंगलवार’ जागरूकता अभियान चलाबए पर सेहो बल देल गेल।

ऑपरेशन साइबर प्रहारमे 507 गिरफ्तारी भेल अछि। बैठकमे जानकारी देल गेल जे ऑपरेशन साइबर प्रहार अंतर्गत संगठित साइबर अपराधीसभक विरुद्ध व्यापक अभियान चलाओल गेल। एहि क्रममे 6,251 म्यूल बैंक खाताक सत्यापन कएल गेल, 702 व्यक्तिक विरुद्ध कानूनी कार्रवाई शुरू भेल आ 507 आरोपी गिरफ्तार कएल गेलाह।

समीक्षामे बताओल गेल जे देशक शीर्ष साइबर हॉटस्पॉट जिलासभमे नवादा दोसर, नालंदा चौठ, पटना सातम आ शेखपुरा पन्द्रहम स्थान पर अछि। एटीएम आ चेकक माध्यमसँ धोखाधड़ीक मामिलामे सेहो पटना प्रमुख हॉटस्पॉटमे शामिल अछि। एहि जिलासभमे विशेष निगरानी आ त्वरित कार्रवाईक निर्देश देल गेल अछि।

पीड़ितसभक 224.53 लाख रुपैया लौटेबाक आदेश देल गेल अछि। Money Restoration Module (MRM) अंतर्गत साइबर ठगीक 16,593 मामिला तैयार कएल गेल अछि। एहिमेसँ 5,642 मामिलामे त्वरित कार्रवाई करैत पीड़ितसभक 224.53 लाख रुपैया वापस करबाक आदेश जारी कएल गेल। Grievance Redressal Module (GRM) अंतर्गत बैंक खाता फ्रीजसँ जुड़ल शिकायतसभक 98 प्रतिशतसँ बेसी निस्तारण कऽ बिहार उल्लेखनीय उपलब्धि हासिल कयलक अछि।

CIAR (समन्वय) पोर्टल मार्फत अन्य राज्यसँ प्राप्त अंतरराज्यीय जांच अनुरोधसभमे बिहार पुलिस 90.22 प्रतिशत मामिलाक निष्पादन कयने अछि। तहिना सहयोग पोर्टलक माध्यमसँ भेजल अनुरोध पर 75.65 प्रतिशत आपत्तिजनक आ भ्रामक यूआरएल हटाओल जा चुकल अछि।

4,221 पुलिसकर्मी प्रशिक्षित कयल गेल अछि। राज्यमे एखनि धरि 4,221 सँ बेसी पुलिस अधिकारी आ कर्मीकेँ साइबर अपराध अनुसंधान आ साइबर सुरक्षाक विशेष प्रशिक्षण देल जा चुकल अछि। मुख्य सचिव एक लाख रुपैयासँ बेसीक साइबर ठगीक मामिलामे e-Zero FIR दर्ज करि शीघ्र नियमित एफआईआरमे बदलबाक निर्देश देलनि। संगहि जिलाधिकारीसभकेँ DLBCक माध्यमसँ म्यूल खातासभ फ्रीज करबाक आ पीड़ितसभकेँ शीघ्र धनराशि वापस दियेबाक प्रक्रिया तेज करबाक निर्देश सेहो देल गेल।