‘हर-हर मोदी, घर-घर मोदी’सँ गूंजल दरभंगा जंक्शन, भारत माता की जय, वन्दे मातरमसँ सेहो माहौल बनल

दरभंगा समदिया

*

शनि राति दरभंगा जंक्शन पर अमृत भारत ट्रेनक भव्य स्वागत भेल। स्टेशन परिसर हर-हर मोदी, घर-घर मोदी, भारत माता की जय, वन्दे मातरम् केर नारासँ गूंजि उठल। बैण्डक कलाकार लोकनि महफिल सजओने छलथि, आइ श्रीराम हमर घर आयल छथि… रामजी की निकली सवारी, रामजी की लीला है न्यारी… सुंदर धुन बजाय आकर्षण जोड़लक। अयोध्यासँ घुरि रहल ट्रेन आ यात्रीसभ पर फूलक वर्षा कयल गेल। माछ, मखान, पानसँ स्वागत कएल गेल। पहिल साँझसँ रामबाबू झा, रत्ना झा, आयुष्मान, जूली झा, संजीव साह आदि मिथिलाक प्रसिद्ध कलाकार लोकनि अपन प्रस्तुतिसँ लोककेँ विभोर केलनि। जंक्शन पर सांसद डॉ. गोपालजी ठाकुर, विधायक मुरारी मोहन झा, मिश्रीलाल यादव, पूर्व विधायक अमरनाथ गामी, अश्विनी यादव, संजय सिंह, रजनीश झा, बालेन्दु झा, भाजपा जिला अध्यक्ष जीवछ सहनी सहित हजारो लोक उपस्थित छलाह। सांसद कहलनि जे प्रधानमंत्री नरेन्द्र मोदी दरभंगाकेँ नव अमृत भारत ट्रेनक ऐतिहासिक उपहार देलनि अछि। रामक भूमि अयोध्याकेँ माता जानकी नगरसँ जोड़बाक लेल ई ट्रेन मिथिलावासीक लेल एकटा अनूठा उपहार अछि। जे नव वर्ष यानी 1 जनवरीसँ बिहारकेँ अमृत भारत एक्सप्रेस ट्रेनक तोहफा भेटय जा रहल अछि। ई ट्रेन समस्तीपुर रेलवे डिवीजनक अन्तर्गत चलत। एकर मार्ग दरभंगासँ आनंद विहार धरि होयत। एकर मार्गमे भगवान रामक नगरी अयोध्या सेहो सम्मिलित अछि। रेलवे द्वारा एहि ट्रेनक समय सारणी सेहो जारी कयल गेल अछि।