भरत भूषण तिवारीक परिवारकेँ आर्थिक सहायता आ एक परिजनकेँ नौकरी देबाक सरकारक घोषणा
मुख्यमंत्री सम्राट चौधरीक ऐलान, न्यायिक जांचक अंतरिम रिपोर्टक आधार पर लेल गेल निर्णय
पटना । समदिया
बिहारक चर्चित भरत भूषण तिवारीक कथित पुलिस मुठभेड़मे भेल मृत्यु मामिलामे मुख्यमंत्री सम्राट चौधरी बृहस्पतिकेँ पैघ घोषणा कयलनि। ओ दिवंगत भरत भूषण तिवारीक परिवारकेँ आर्थिक सहायता देबाक संगहि परिवारक एक सदस्यकेँ सरकारी नौकरी देबाक घोषणा कयलनि।
मुख्यमंत्री कहलनि जे न्यायिक जांचक अंतरिम रिपोर्टक आधार पर बिहार सरकार भरत भूषण तिवारीक परिवारकेँ आर्थिक सहायता देत आ परिवारक एक सदस्यकेँ सरकारी नौकरी प्रदान करत। मुख्यमंत्री सोशल मीडिया मंचक माध्यमसँ एहि निर्णयक जानकारी साझा कयलनि।
ई मामिला 17 जूनक भोरे भोजपुर जिलाक शाहपुर थाना क्षेत्रक बिलौटी गाममे भेल पुलिस मुठभेड़सँ जुड़ल अछि। बिलौटी निवासी काशीनाथ तिवारीक पुत्र भरत भूषण तिवारीकेँ पुलिस कार्रवाईक दौरान पांच गोली लगबाक बात सामने आयल छल। गंभीर रूपसँ घायल भरत भूषणकेँ इलाज लेल अस्पताल लऽ गेल, जतय बादमे हुनकर मृत्यु भऽ गेल।
घटनाक बाद भरत भूषणक परिजन आ स्थानीय लोक पुलिस कार्रवाई पर गंभीर प्रश्न उठौलनि। परिजनक आरोप छल जे भरत भूषण पुलिसक समक्ष आत्मसमर्पण कऽ देने छलाह, तैयो हुनका गोली मारल गेल। घटनाक बाद क्षेत्रमे तनावक स्थिति बनल छल आ लोक विरोध प्रदर्शन सेहो कयने छल।
मामिलामे प्राथमिकी दर्ज भेलाक बाद निष्पक्ष जांचक मांग तेज भऽ गेल। विवाद बढ़लाक बाद राज्य सरकार पूरा घटनाक्रमक जांच लेल न्यायिक आयोगक गठन कयलक। आयोगकेँ मुठभेड़क परिस्थिति, घटनाक्रम आ एहिसँ जुड़ल विभिन्न तथ्यक पड़ताल करबाक जिम्मेदारी देल गेल अछि।
मुख्यमंत्रीक ताजा घोषणा न्यायिक जांचक अंतरिम रिपोर्टसँ जोड़ि कऽ देखल जा रहल अछि। सरकारक एहि निर्णयसँ पीड़ित परिवारकेँ राहत भेटबाक उम्मीद अछि।
भरत भूषण तिवारी मामिलाकेँ लऽ कऽ बिहारक राजनीति सेहो काफी गरम रहल अछि। विपक्षी दल पुलिस कार्रवाई आ कानून-व्यवस्थाकेँ लऽ कऽ सरकार पर लगातार निशाना साधैत रहल अछि। ओतहि सरकारक तरफसँ मामिलाक निष्पक्ष जांच करबाक आश्वासन देल जाइत रहल। आब आर्थिक सहायता आ एकटा परिजनकेँ सरकारी नौकरी देबाक घोषणासँ ई मामिला फेर राजनीतिक आ प्रशासनिक चर्चाक केंद्रमे आबि गेल अछि।
