मोदी मंत्रिमंडलमे केन्द्रीय मंत्रिपरिषदक सदस्यक बीच विभागक वितरण कयल गेल अछि। संगहि मोदी मंत्रिमंडलमे मुसलमानक लेल जगह नहिं भेटला पर बयानबाजी शुरू भऽ गेल अछि।
राजनीति आ बयानबाजी शुरू भऽ गेल अछि। एहि मुद्दा पर केंद्रीय मंत्री गिरिराज सिंह कहलनि, “जीति कऽ कियो नहिं आयल तऽ कोना बनत मंत्री। जखनि हमर कोनो एहन प्रतिनिधिये नहिं अछि, तखनि ओ कोना बनि सकैत छथि ? जँ प्रतिनिधि होइत तखन ओ निश्चित बनितथि। प्रधानमंत्री नरेन्द्र मोदीक नीति स्पष्ट अछि, भारतकेँ एकटा विकसित राष्ट्र बनयबाक अछि। जखन नीति स्पष्ट होइत अछि आ मिशन स्पष्ट होइत अछि तखनि कोनो समस्या नहिं होइत छैक। ई कांग्रेस जकाँ नहिं अछि। ई मोदी जीक सरकार अछि, देश बढ़ैत रहत।”
राष्ट्रीय जनता दल (राजद) नेता तेजस्वी यादव मंगल दिन कोनो मुस्लिम सांसदकेँ केंद्रीय मंत्रिमंडलमे शामिल नहिं करबा पर नाराजगी व्यक्त कयलथि, ओ कहलनि जे सबके संग लऽ कऽ चलय केर चाही, चाहे ओ कोनो धर्म या जातिक होय। सबहक सम्मान हेबाक चाही।
मोदी ३.० सरकारक गठनक समय ७१ मंत्री पद आ गोपनीयताक शपथ लेलनि। एहि मंत्री सभक विभागक बँटवारा भऽ गेल अछि। भारतक राष्ट्रपति दिससँ प्रधानमंत्रीक सलाह पर केन्द्रीय मंत्रिपरिषदक सदस्यक बीच विभागसभ वितरित कयल गेल अछि। एहन स्थितिमे प्रधानमंत्री नरेन्द्र मोदी लग कार्मिक, लोक शिकायत आ पेंशन मंत्रालय, परमाणु ऊर्जा विभाग, अंतरिक्ष विभाग आ अन्य सब विभागक संग सब महत्वपूर्ण नीतिगत मुद्दा आ अन्य सभ विभाग जे कोनो मंत्रीकेँ आवंटित नहिं कयल गेल अछि, से विभाग पीएम मोदी लग एखनि अछि।
