एनएच-27 पर भीषण टक्करमे मां बेटा समेत चारि केर मृत्यु

पूर्णिया। समदिया

अररिया-पूर्णिया राजमार्ग (एनएच-27) पर कुसियारगांव पार्क लग बुधदिन भोरमे भेल भयावह सड़क दुर्घटनामे दू महिला सहित चारि गोटेक दुखद मृत्यु भ गेल आ सात गोटे गंभीर रूपसँ घायल भ गेल। एकटा साइकिल सवार केर बचाबयकेँ कोशिशमे हाई स्पीड स्कॉर्पियो आ मारुति ब्रेज़ा कारक आमने-सामने टक्कर भेला पर दुर्घटना भेल। एकर असर एतेक बेसी छल जे दुनू गाड़ी पूरा तरहेँ नष्ट भ गेल।

प्रत्यक्षदर्शीक अनुसार बुधदिन भोर करीब 11:30 बजे दुर्घटना भेल। अररियासँ एगो हाई स्पीड स्कॉर्पियो आबी रहल छल, जकर रफ्तार 100 किलोमीटर प्रति घंटासँ बेसी बताओल जा रहल अछि। कुसियारगांव पार्क लग अचानक एकटा साइकिल सवार आबि गेल। स्कॉर्पियो ड्राइवर साइकिल सवारकेँ बचाबयक कोशिश कयलक, जाहिसँ गाड़ीक नियंत्रण खत्म भ गेल, सड़कक कातक रेलिंगसँ टकरा गेल, फेर एकटा डिवाइडर पार कय सीधा विपरीत दिशासँ आबय वला मारुति ब्रेज़ा कारसँ टकरा गेल। टक्करक दौरान अररिया जिलाक गैयारी गामक निवासी मोहम्मद कोनेन (25 वर्ष) केर  मृत्यु मौका पर भ गेल।

स्कॉर्पियोमे सवार सभ लोक पूर्णिया जिलाक बिशनपुर गामक निवासी छल आ एकटा रिश्तेदार (मामा) केर  श्राद्ध कर्ममे शामिल होमय लेल मधेपुराक रामनगर जा रहल छल। दुर्घटनाक बाद एनएच -24 पर अफरा-तफरी मचि गेल। स्थानीय निवासी आ राजमार्ग गश्ती पुलिसक सहयोगसँ सभ घायलकेँ तुरंत अररिया सदर अस्पताल पहुंचा देल गेल। अस्पतालक डॉक्टर स्कार्पियोमे सवार तीनू केर मृत घोषित कय देलनि। मृतककेँ पहिचान पूर्णियाक बिशनपुर निवासी मायानंद झा (60), शांति देवी (60) आ हुनक बेटा गौतम कुमार ठाकुर (49) केर रूपमे कयल गेल अछि। मृतक शांति देवी आ मायानंद झा भैंसुर-भावज छलाह।

एहि भयावह टक्करमे स्कॉर्पियो आ ब्रेज़ामे सवार कुल सात गोटे गंभीर रूपसँ घायल भ गेलाह। घायलमे जवाहर झा (60), लक्ष्मी ठाकुर (43) आ मधुलता देवी (55) सहित ब्रेज़ा कारमे सवार यात्री सेहो शामिल छथि। सभ घायलक इलाज अररिया सदर अस्पतालमे भ रहल अछि, जतय किछु केर हालत गंभीर बनल अछि।

घटनाक सूचना भेटैत सदर थाना आ ट्रैफिक पुलिस अस्पताल पहुंचल। पुलिस चारू लाशकेँ अपना कब्जामे ल कय पोस्टमार्टम लेल पठा देलक आ दुर्घटनाग्रस्त गाड़ीकेँ हाईवेसँ निकालि कय यातायात बहाल कयलक। पुलिसक अनुसार स्कॉर्पियोक बेसी गति आ लापरवाही दुर्घटनाक मुख्य कारण बुझाइत अछि।