बीएन मंडल विश्वविद्यालय, मधेपुराक पूर्व कुलपति डा रामबदन यादवक मंगलदिन संँझुका पहरमे निधन भऽ गेलनि। ओ किछु दिनसँ बीमार चलि रहल छलाह। हुनक निधनक सूचना भेटला पर विद्यापति सेवा संस्थान दिवंगत पुण्यात्माकें भाव भरल श्रद्धांजलि अर्पित कयलक। संस्थानक महासचिव डॉ बैद्यनाथ चौधरी बैजू अपन संदेशमे हुनका मिलनसार स्वभाव वाला मिथिला-मैथिलीक विकासक शिक्षाविद् हितैषी बतौलनि। ओ कहलनि जे बीएन मंडल विश्वविद्यालयक कुलपतिक रूपमे अपन उपलब्धिपूर्ण सेवा दऽ चुकल डा रामबदन यादव बहुगुण संपन्न व्यक्तित्व छलाह। ओ उत्कृष्ट रसायनशास्त्री होयबाक संगहि लोकप्रिय शिक्षक सेहो छलाह। अपन कृतित्व आ व्यक्तित्व लेल ओ आम मिथिलावासीक दिलो-दिमागमे सदैव जीवंत बनल रहताह।
मैथिली अकादमीक पूर्व अध्यक्ष पं कमलाकांत झा हुनका मिथिला-मैथिलीक विकास लेल सतत चिंतनशील रहनिहार हितचिंतक बतेलनि। डा बुचरू पासवान हुनका युगद्रष्टा आ त्यागी पुरुष बतबैत कहलनि जे मिथिलामे शैक्षणिक विकास हुनक जीवनक एकमात्र उद्देश्य रहल। प्रो जीवकांत मिश्र हुनका मिथिला-मैथिलीक हितचिंतक शिक्षक आ प्रशासक बतबैत मिथिलाक शैक्षणिक विकासमे हुनक भूमिकाकेँ महत्वपूर्ण बतौलनि। वरिष्ठ साहित्यकार मणिकांत झा कहलनि जे रसायनशास्त्र विषयक छात्र आ शोधार्थी लोकनिक शैक्षणिक विकासमे अपन सम्पूर्ण जीवन समर्पित कयनिहार डा रामबदन यादव मिथिलाक शैक्षणिक गुणवत्ताक आजीवन जीवंत बनौने रखलाह।
मीडिया संयोजक प्रवीण कुमार झा सीएम साइंस कॉलेज आ विश्वविद्यालय रसायन शास्त्र विभागमे एकटा कुशल शिक्षक आ बीएन मंडल विश्वविद्यालयमे कुलपतिक रूपमे हुनक कार्यकाल केर रेखांकित करैत कहलनि जे मिथिलाक शैक्षणिक विकास लेल वैचारिक क्रांति अननिहार रसायनशास्त्रीक रूपमे ओ सदति याद कयल जेताह। वरिष्ठ साहित्यकार डॉ महेंद्र नारायण राम हुनका एकटा संवेदनशील शिक्षक बतौलनि। संवेदना व्यक्त कयनिहार अन्य लोकमे महात्मा गाँधी शिक्षण संस्थानक चेयरमैन हीरा कुमार झा, हरिश्चंद्र हरित, डॉ गणेश कांत झा, विनोद कुमार झा, प्रो विजयकांत झा, प्रो चंद्रशेखर झा बूढा भाई, डॉ उदय कांत मिश्र, डॉ महानंद ठाकुर, दुर्गानंद झा, आशीष चौधरी, पुरुषोत्तम वत्स, नवल किशोर झा आदि शामिल छलथि।
