विदेश मंत्री एस जयशंकर अंततः मालदीवक सङ्ग चलि रहल कूटनीतिक विवाद पर अपन चुप्पी तोड़लनि। ओ कहलनि “कियो ई जिम्मेदारी नहिं लऽ सकैत अछि जे सभ गोटे भारतक हर समय समर्थन करत।”
नागपुरमे हालमे भेल टाउनहॉल बैसारक दौरान मालदीवक सङ्ग तनावक विषयमे पूछला पर जयशंकर कहलनि, “राजनीति राजनीति अछि। हम एहि बातक गारंटी नहिं दऽ सकैत छी जे प्रत्येक देशक सभ गोटे हमर समर्थन करथि या हमरासँ हरदम सहमत रहताह। ओ आगू कहलनि “हम जे करय केर कोशिश कऽ रहल छी ओ अछि देशक संग संपर्क मजबूत करब। हम बहुत हद तक सफल भेल छी। पिछला १० सालमे बहुत रास देशक संग हमर नीक संबंध विकसित भेल अछि।”
जयशंकर पछिला एक दशकमे राजनीतिक सम्बन्धमे उतार-चढ़ावक बावजूद लोकक बीच सकारात्मक भावनाकेँ बढ़ावा देबा पर ध्यान केन्द्रित करैत वैश्विक स्तर पर मजबूत सम्बन्ध बनेबाक भारतक प्रयासकेँ रेखांकित कयलनि।
ओ कहलनि जे राजनीतिमे उतार-चढ़ाव भऽ सकैत अछि मुदा ओहि देशक लोकक भारतक प्रति नीक भावना अछि आ नीक सम्बन्ध रखबाक महत्वकेँ बुझैत अछि। आगू, ओ अन्य देशमे बुनियादी ढाँचाक विकासमे भारतक भागीदारीक सेहो उल्लेख कयलनि।
ओ कहलनि “कखनो-कखनो किछु चीज सही राह पर नहिं जाइत अछि। तखन सब किछु ठीक करबाक लेल अहाँकेँ तर्क देबय पड़त।”
भारत आ मालदीवक बीच कूटनीतिक विवाद तखन उत्पन्न भेल जखन मालदीवक तीनटा नेता प्रधानमंत्री नरेन्द्र मोदीक विरुद्ध अपमानजनक टिप्पणी कयलनि आ हुनक हालक लक्षद्वीप यात्राक आलोचना कयलनि। भारत एहि टिप्पणीक कड़ा निन्दा कयलक आ मालदीवक राजदूतकेँ विरोध दर्ज करबा लेल समन पठौलक। देशक प्रधानमंत्रीक विषयमे गलत टिप्पणी भारतीय जनतामे आक्रोश भड़का देलक। लोकसभ बॉयकॉट मालदीव नामक अभियान शुरू कयलनि। बढ़ैत विवादकेँ देखैत मालदीव सरकार अपन तीनू मन्त्रीकेँ निलम्बित कऽ देलक।
