जिलामे वाहन निरीक्षण अभियानक दौरान पुलिसकर्मी पर गोली चलाबैक आरोपमे चारि लोककेँ गिरफ्तार कएल गेल अछि। ई घटना शनिदिन देर राति बिहटा इलाकामे परेड ग्राउंडक लग भेल। पुलिसकर्मी सब हथियारबंद लोककेँ नियंत्रित करबाक लेल आत्मरक्षामे जवाबी कार्यवाही केलनि, मुदा एहि घटनामे कियो घायल नहि भेल। एकटा पुलिस आधिकारी कहलनि जे पुलिस निरीक्षण अभियानक दौरान कबाड़ लए जात एक वाहनकेँ रोकबाक कोशिश कएलक, मुदा चालक गाड़ी नहि रोकलक। पुलिसक एक टीम त्वरित रूपसँ वाहनक पीछा कएलक। एकटा आवासीय इलाकामे ओकरा जब्त कएल गेल। अचानक स्थानीय लोक सब हंगामा मचाबए लागल आ वाहनकेँ छुड़ाबैक कोशिश करए लागल।
एहि दौरान हथियारसँ लैस किछु लोक पुलिसकर्मी सभ पर गोलीबारी शुरू कऽ देलक। एकर बाद पुलिस जवाबी कार्यवाहीमे गोली चलेलक। एहि घटनाक सूचना भेटैत आलाधिकारी अतिरिक्त पुलिस बल मौका पर पठेलनि । स्थितिके नियंत्रणमे आनल गेल। अखन धरि चारि लोककेँ गिरफ्तार कएल गेल अछि। अन्य लोक सभकेँ खोज जारी अछि।
