समाजवादी पार्टीक वरिष्ठ नेता आ पूर्व कैबिनेट मंत्री स्वामी प्रसाद मौर्य एक बेर फेर विवादास्पद बयान देलनि अछि। स्वामी प्रसाद मौर्य कासगंजमे कहलनि जे तत्कालीन सरकार संविधान आ कानूनक रक्षाक लेल अराजक तत्वसभ पर गोली चलयबाक आदेश देने छल। ओहि समय तत्कालीन सरकार अपन कर्तव्य पूरा केलक।
समाजवादी पार्टीक नेता स्वामी प्रसाद मौर्य मंगलदिन गणेशपुरमे बौद्ध एकता समिति द्वारा आयोजित बौद्ध जन-जागरूकता सम्मेलनमे मुख्य अतिथिक रूपमे उपस्थित जनसभाकेँ सम्बोधित कऽ रहल छलाह। एहि दौरान ओ कहलनि जे जाहि समय कारसेवक पर गोली चलयबाक आदेश जारी भेल छल, ओहि समय तत्कालीन सरकार अपन कर्तव्य निभा रहल छल। ओ अपन कर्तव्यक पालन कऽ रहल छल।
समाजवादी पार्टीक नेता स्वामी प्रसाद मौर्य कहलनि जे जाहि समय अयोध्यामे राम मन्दिर पर ई घटना भेल छल, ओहि समय न्यायपालिका आ प्रशासनक कोनो आदेशक बिना अराजक तत्वसभ द्वारा पैघ स्तरपर तोड़फोड़ कयल गेल छल।
एहि पर तत्कालीन सरकार संविधान आ कानूनक रक्षा, शान्ति आ सौहार्द बनेबाक लेल गोली चलौने छल।
३३ साल पहिने १९९० मे अयोध्याक हनुमान गढ़ी जा रहल कारसेवक पर गोली चलाओल गेल छल। ओहि समय उत्तर प्रदेशमे समाजवादी पार्टीक सरकार छल, मुलायम सिंह यादव यूपीक मुख्यमंत्री छलाह। ओहि दिनमे प्रशासन अयोध्यामे कर्फ्यू लगा देने छल, जाहि कारणेँ भक्तलोकनिकेँ प्रवेश नहिं देल जा रहल छल, मुदा तखनो साधु-सन्त अयोध्या दिस कूच कऽ रहल छलाह। पुलिस बाबरी मस्जिदक १.५ किलोमीटरक दायरामे बैरिकेड लगा देने छल। एम्हर कारसेवकक भीड़ बेकाबू भऽ गेल छल।
३० अक्टूबर, १९९० केँ पहिल बेर कारसेवक पर गोली चलाओल गेल। गोलीसँ पांच गोटे मारल गेल छल। तहियासँ अयोध्यासँ देशक वातावरण गर्म भऽ गेल। गोलीबारीक दू दिनक बाद २ नवम्बर केँ हजारो कारसेवक हनुमान गढ़ी पहुँचलाह। दू साल बाद, ६ दिसंबर, १९९२ केँ विवादित ढांचा ध्वस्त कऽ देल गेल। १९९०क गोलीबारीक घटनाक २३ सालक बाद जुलाई २०१३मे मुलायम सिंह एकटा बयान देने छलथि, एहि बयान पर ओ कहने छलथि जे हुनका गोली चलबाबय केर अफसोस अछि, मुदा हुनका लग आन कोनो विकल्प नहिं छल।
