उत्तराखण्डक नैनीतालमे जंगलमे लागल आगि ३६ घंटासँ बेसी समय पार कऽ चुकल छल। जहिना आगि वायुसेना स्टेशन पहुँचल, राज्य सरकार आ वन विभाग भारतीय वायुसेना आ भारतीय सेनाकेँ बुझयबाक अभियानक लेल बजौलक।
भारतीय वायुसेना आगि बुझाबयमे मदति लेल एमआई-१७ हेलीकॉप्टर तैनात कयलक अछि। जंगलमे लागल आगि बुझाबय लेल हेलीकॉप्टरकेँ भीमताल झीलसँ पानि लेबाक काज देल गेल अछि। उत्तराखंडक मुख्यमंत्री पुष्कर सिंह धामी कहलनि अछि जे सरकार आ वन विभाग अग्निशमन अभियानक लेल सेना आ वायुसेनाकेँ बजौलक अछि।
सीएम कहलनि “जंगलक आगि हमरा लेल चुनौती अछि। इ बड़का आगि अछि। हम सभ आवश्यक जरूरतक लेल काज कए रहल छी। हम सेनासँ मदद मांगने छी। मुख्यमंत्रीक हल्द्वानीमे एकटा बैसार सेहो करबाक कार्यक्रम अछि जाहिमे चलि रहल जंगलमे लागल आगि, एकरा कोना नियंत्रित कयल जाय आ तापमान बढ़ला पर एहन घटना फेरसँ होयबासँ रोकल जाय, एहि पर चर्चा कयल जायत।
आगि एखन धरि कतेको हेक्टेयर हरियाली जरा चुकल अछि आ एखनहु जारी अछि। आगि लगलाक कारण नैनीताल प्रशासन यातायात पर प्रतिबंध लगा देलक अछि आ नैनी झीलमे लोकसभकेँ नौका विहारक गतिविधि पर रोक लगा देलक अछि। नैनीताल प्रशासन द्वारा आगि बुझाबयमे मदति लेल मनोरा रेंजक ४० आ दूटा वन रेंजर सहित ४२ जवानक एकटा दल तैनात कयल गेल अछि। पछिला २४ घंटामे उत्तराखंडक कुमाऊँ क्षेत्रमे जंगलमे आगि लगबाक २६ टा घटना सामने आयल अछि। गढ़वालमे सेहो पाँचटा घटनाक सूचना भेटल अछि।
