चुनाव आयोग लोकसभा चुनावसँ ठीक पहिने आम आदमी पार्टीकेँ पैघ झटका देलक अछि। दरअसल, आयोग पार्टीक प्रचार गीत पर प्रतिबंध लगा देलक अछि। हालहिमे पार्टी अपन अभियान गीत शुरू कयलक। दू मिनटक एहि प्रचार गीतमे अरविंद केजरीवाल आ मनीष सिसोदिया सेहो देखल गेल छलाह। ई गीत पार्टीक विधायक दिलीप पाण्डेय लिखने छलाह। संगहि आम आदमी पार्टी आयोगक एहि कदमकेँ केन्द्रक तानाशाही बतौलक अछि।
आम आदमी पार्टीक वरिष्ठ नेता आ मंत्री आतिशी कहलनि जे भाजपाक नाम गीतमे कतहु नहि छल। चुनाव आयोगकेँ जेलक वोटसँ पर आपत्ति अछि जे एकदम गलत अछि। एहिमे कोनो आपत्तिजनक बात नहिं अछि जे एहि गीतपर प्रतिबन्ध लगाओल जयबाक चाही। एहि गीत द्वारा कतहु चुनाव आचार संहिताक उल्लंघन नहिं कयल जा रहल अछि। एकरामे देल गेल चित्र सत्य अछि।
“भारत निर्वाचन आयोग एकटा प्रतिष्ठित संस्थान अछि। जखन एकर आयुक्त टीएन शेषन छलाह तखन ओ एकर गरिमा बढ़ौलनि। देशमे निष्पक्ष चुनाव करयबाक श्रेय हुनका देल जाइत अछि। हुनक काजक माध्यमसँ हुनका आइयो स्मरण कयल जाइत अछि।”
आतिशी कहलनि, “हम चुनाव आयुक्तसँ अपील करैत छी जे ओ एहन काज नहिं करथि जे आबयवला समयमे २०२४ केर चुनावकेँ याद राखल जायत कियैक तँ २०२४ केर चुनावमे लोकतंत्र समाप्त भऽ गेल अछि। २०२४ केर चुनावमे भारत निर्वाचन आयोग तटस्थ नहिं रहल आ २०२४ मे भारतक चुनाव पाकिस्तानक चुनाव बनि गेल। एहि लेल हम चुनाव आयोगसँ अपील करैत छी जे विपक्षक प्रचार रोकब बंद करू आ भाजपा द्वारा आचार संहिताक उल्लंघन पर सेहो कारवाई करू।”
दिल्लीक मुख्य निर्वाचन अधिकारी (सीईओ) कार्यालय कहलक अछि जे आम आदमी पार्टीक प्रचार गीत ‘जेल का जवाब वोट से’ मे केबल प्रोग्राम कोडक उल्लंघन भेल अछि। कोनो राजनीतिक दल अपन प्रचार गीत वा अभियान वीडियोमे न्यायपालिका पर सवाल नहिं उठा सकैत अछि। केकरो जेलमे रहब न्यायपालिकासँ जुड़ल विषय अछि।
ओ कहलनि जे अभियान गीत ‘जेल का जवाब वोट से’ पर न्यायपालिका पर सवाल उठल अछि। अतः मीडिया प्रमाणन आ निगरानी समिति (एमसीएमसी) अभियान गीतक सामग्रीमे संशोधनक सिफारिश कयलक आ ओकरा वापिस कऽ देलक। संशोधनक संग आम आदमी पार्टी अनुमोदनक लेल फेरसँ आवेदन कऽ सकैत अछि। आम आदमी पार्टीकेँ इहो कहल गेल अछि जे जँ ओ एमसीएमसीक निर्णयसँ सहमत नहिं अछि तखन ओ एकरा सीईओक अध्यक्षता वला राज्य स्तरीय समितिमे चुनौती दऽ सकैत अछि।
