कोचिंग संस्थानमे भेल झड़प मामिलामे फैजल खानक अंतरिम सुरक्षा 3 जुलाई धरि बढ़ल
पटना। समदिया
‘खान सर’ केर नामसँ लोकप्रिय फैजल खानकेँ मंगलदिन पटना सिविल कोर्टसँ बिहारक प्रख्यात शिक्षक रोशन आनंद’क संग जारी कानूनी विवादक संबंधमे अंतरिम राहत भेटल। खान केर अग्रिम जमानत याचिकाक सुनवाई करैत कोर्ट हुनक गिरफ्तारी सहित कोनो भी जबरदस्ती केर कार्यवाहीसँ 3 जुलाई धरि सुरक्षा प्रदान कय देलक। जांच अधिकारीसँ आओर दस्तावेज मँगलाक बाद कोर्ट कार्यवाहीकेँ अगिला तारीख धरि स्थगित कय देलक।
सुनवाई केर दौरान कोर्ट पुलिसकेँ एहि घटनासँ जुड़ल अपडेट केस डायरी आओर फैजल खान केर निजी अंगरक्षककेँ हथियार लाइसेंसक संबंधमे सत्यापन रिपोर्ट जमा करय केर निर्देश देलक अछि।
कोर्टक कहनाय छल जे एहि दस्तावेजकेँ रिकॉर्डमे राखलाक बाद अग्रिम जमानत याचिका पर आगू विचार कएल जाएत। ता धरि फैजल खानकेँ गिरफ्तारीसँ अंतरिम सुरक्षा भेटैत रहत।
ई मामिला फैजल खान आ रोशन आनंद केर कोचिंग संस्थानसँ जुड़ल व्यक्तिक बीच हिंसक झड़पसँ उपजल अछि। पुलिस केर अनुसार 2 जूनक राति दुनू समूहक बीच तनाव बढ़ि गेल, जाहिसँ इलाकामे तोड़फोड़ भेल। पुलिस केर इहो जानकारी भेटल अछि जे एहि दौरान हवामे गोली चलल छल।
विपक्षी समूहक सदस्यक आरोप अछि कि फैजल खान केर निजी सुरक्षाकर्मी घबराहट फैलाबय आ भीड़केँ डराबय लेल गोलीबारी कयलक। इ आरोप चली रहल जांचक हिस्सा अछि। घटनाक बाद पटना पुलिस फैजल खान, रोशन आनंद, हुनक सुरक्षाकर्मी आओर कतेको अज्ञात व्यक्तिक खिलाफ प्राथमिकी दर्ज कय हत्याक प्रयास आओर दंगा सहित कतेको तरहक आरोप लगा देलक। गोलीबारीमे कथित तौर पर शामिल दूटा सुरक्षाकर्मीकेँ गिरफ्तार कयल गेल अछि आ ओ न्यायिक हिरासतमे अछि।
पिछला एक मासमे कानूनी प्रक्रियामे कतेको घटनाक्रम भेल अछि। फैजल खान शुरूमे 9 जूनकेँ अग्रिम जमानतक लेल आवेदन कयने छलाह। एम्हर 15 जूनकेँ रोशन आनंदकेँ नियमित जमानत भेटल छल। जनतब अछि जे एहि मामिलामे फैजल खान द्वारा दायर शिकायतमे रोशन आनंद आ हुनकर भाई प्रिंस यादवकेँ सेहो आरोपीक रूपमे नामित कयल गेल छल। विवादक बीच राजकुमार यादवक नेपालमे निधन भ गेल। मामिला केर जांच जारी अछि आ पुलिस केर अपडेट कयल गेल केस डायरी आ अंगरक्षकक हथियार लाइसेंसक संबंधमे सत्यापन रिपोर्टक समीक्षाक बाद पटना कोर्ट फैजल खान केर अग्रिम जमानत याचिका पर सुनवाई 3 जुलाईकेँ फेरसँ शुरू होयत से उम्मीद अछि।
