बुधक रात्रिमे मिथिला क्षेत्रीय बिहारक मधुबनी जिलाक पंडौल प्रखंड अंतर्गत उदयपुर बिठुआर पंचायतक ठाकुर टोल गामक वार्ड संख्या ०७ केर प्राथमिक विद्यालयमे चोरीक घटनाक समाचार भेटल अछि। एहि संबंधमे मैपुप्र समदियाक विद्यालयक प्रधानाध्यापकसँ गप्प भेल आ हुनका अनुसार एकटा कमरामे चाउरक बोरा सभ राखल छल, रातिमे अज्ञात चोर द्वारा उक्त कमराक ताला तोड़ल गेल आ २१ बोरा चाउरक चोरी भेल। भोरमे जखन शिक्षक सभ स्कूल पहुँचलाह तखनि एकर जानकारी शिक्षक सभकेँ भेटल।
विशेष खोजबीन कयला पर जानकारी भेटल जे एकटा चाउरक बोरा लगक पोखरिक कातमे फेकल छल। तकर बाद शिक्षक एकर जानकारी किछु ग्रामीणकेँ देलखिन। ग्रामीण स्कूल पर हालत देखि हतप्रभ छलथि। ग्रामीण सभ प्रधानाध्यापकेँ सुझाव देलखिन जे एकर जानकारी प्रखंड शिक्षा पदाधिकारी, पंडौलक संग अन्य उच्चाधिकारीकेँ दियौक आ एकर पुलिस शिकायत सेहो दर्ज करबाउ। शिक्षकगण ग्रामीणक बात पर सहमित दैत कहलखिन जे अबिलम्ब एकर सूचना सम्बंधित अधिकारीकेँ देब। मुदा समाचार सम्प्रेषण तक प्रखंड शिक्षा पदाधिकारी, पंडौल अपना आपकेँ मामिलासँ अनभिज्ञ बतौलनि।
