माइक्रोसॉफ्टक सह-संस्थापक आ अरबपति व्यवसायी बिल गेट्स शनिदिन कहलनि जे भारतमे निर्मित डिजिटल पब्लिक इन्फ्रास्ट्रक्चर (डीपीआई) सन तकनीक दुनियाक लेल गेम चेंजर भऽ सकैत अछि।
प्रधानमंत्री नरेन्द्र मोदीक सङ्ग आर्टिफिशियल इंटेलिजेंस सँ लऽ कऽ स्वास्थ्य सेवा आ जलवायु परिवर्तन धरि कतेको विषय पर बातचीत करय केर एक दिन बाद गेट्स कहलनि जे प्रौद्योगिकी देशक लाखो लोकक लेल डिजिटल विभाजनकेँ पाटि रहल अछि।
गेट्स एक्स पर पोस्ट कयलनि, “अपन भारत यात्राक क्रममे हम देखलहुँ जे कोना कृत्रिम बुद्धिमत्ता आ डीपीआई छोट खेतिहर किसानक शिक्षा, स्वास्थ्य देखभाल आ जीवनक पहुँचमे सुधार कऽ रहल अछि। ई तकनीक दुनियाक लेल परिवर्तनकारी भऽ सकैत अछि।”
नासकॉमक नेतृत्ववला हालक एकटा रिपोर्टमे कहल गेल अछि जे युनिफाइड पेमेंट्स इंटरफेस (यूपीआई) आ आधार सन डीपीआई २०३० धरि भारतकेँ ८ ट्रिलियन डॉलरक अर्थव्यवस्थाक दिस अग्रसर करबाक लेल तैयार अछि। एहिसँ देशकेँ १ ट्रिलियन डॉलरक डिजिटल अर्थव्यवस्थाक लक्ष्य प्राप्त करबामे सहायता भेटत।
गेट्सक संग अपन बातचीतक दौरान, पीएम मोदी एआई सँ लऽ कऽ डिजिटल प्रौद्योगिकीमे भारतक प्रभावशाली प्रगति समेत कतेको महत्वपूर्ण विषय पर चर्चा कयने छलथि।
