बिहारक मुख्यमंत्री नीतीश कुमार शुक्रदिन अपन मंत्रिमण्डलक विस्तार कयलनि। शनि दिन मंत्री सभक विभागक वितरण कयल गेल। मंत्रीमंडल सचिवालय विभाग एकर अधिसूचना जारी कयलक।
अधिसूचनाक अनुसार मुख्यमंत्री नीतीश कुमार सामान्य प्रशासन, गृह, कैबिनेट सचिवालय, निगरानी, निर्वाचन सहित एहन सब विभाग जे केकरो आबंटित नहिं कयल गेल अछि से अपना लग रखलनि अछि। उप मुख्यमंत्री सम्राट चौधरीकेँ वित्त, वाणिज्यि कर एवं उप मुख्यमंत्री विजय कुमार सिन्हाकेँ सड़क निर्माण, खान-भूतत्व, कला, संस्कृति आ युवा विभागक प्रभार देल गेल अछि।
विजय कुमार चौधरीकेँ जल संसाधन, संसदीय कार्य, बिजेन्द्र प्रसाद यादवकेँ ऊर्जा आ योजना एवं विकास, प्रेम कुमारकेँ सहकारिता, पर्यावरण, वन एवं जलवायु परिवर्तन, श्रवण कुमारकेँ ग्रामीण विकास आ संतोष कुमार सुमनकेँ सूचना प्रावैधिकी, लघु जल संसाधन आ आपदा प्रबन्धनक जिम्मेवारी देल गेल अछि।
अधिसूचनाक अनुसार सुमित सिंहकेँ विज्ञान, प्रावैधिकी आ तकनीकी शिक्षा, रेणु देवीकेँ पशु, मत्स्य संसाधन एवं मंगल पांडेय स्वास्थ्य आ कृषि मंत्री बनाओल गेल अछि। नीरज कुमार सिंहकेँ लोक स्वास्थ्य अभियंत्रण विभाग, अशोक चौधरीकेँ ग्रामीण काज, लेसी सिंहकेँ खाद्य आ उपभोक्ता संरक्षण एवं मदन सहनीकेँ समाज कल्याण विभागक मंत्री बनाओल गेल अछि।
नीतीश मिश्राकेँ उद्योग, पर्यटन, नितीन नवीनकेँ नगर विकास आ आवास एवं विधि, दिलीप जायसवालकेँ राजस्व एवं भूमि सुधार, महेश्वर हजारीकेँ सूचना आ जनसंपर्क विभाग, शीला कुमारीकेँ परिवहन आ सुनील कुमारकेँ शिक्षा मंत्रालयक प्रभार देल गेल अछि।
जनक रामकेँ अनुसूचित जाति, अनुसूचित जनजाति कल्याण, हरि सहनीकेँ पिछड़ा वर्ग आ अति पिछड़ा वर्ग कल्याण, कृष्ण नंदन पासवानकेँ गन्ना उद्योग, जयंत राजकेँ भवन निर्माण, जमा खानकेँ अल्पसंख्यक कल्याण, रत्नेश सदाकेँ मद्य निषेध, उत्पाद, निबंधन विभाग, केदार प्रसाद गुप्ताकेँ पंचायती राज, सुरेन्द्र मेहताकेँ खेल आ संतोष कुमार सिंहकेँ श्रम संसाधनक जिम्मेदारी देल गेल अछि।
