संसदक बजट सत्रक पहिल दिन दुनू सदन – लोकसभा आ राज्यसभाक संयुक्त बैसारकेँ सम्बोधित करैत राष्ट्रपति द्रौपदी मुर्मू दावा कयलनि जे पछिला सालमे दुनिया दूटा पैघ युद्ध देखलक आ कोरोना सन वैश्विक महामारीक सामना कयलक मुदा एहन वैश्विक संकटक बावजूद केन्द्र सरकार देशमे महंगाई केर नियंत्रणमे रखलक आ आम भारतीयपर बोझ नहिं बढ़य देलक।
ओ कहलनि जे दुनियामे गम्भीर सङ्कटक बीच भारत सबसँ तेजीसँ बढ़ैत प्रमुख अर्थव्यवस्था बनि गेल, भारतक विकास दर लगातार २ तिमाहीमे ७.५ प्रतिशतसँ ऊपर छल।
मोदी सरकारक काज आ उपलब्धि पर प्रकाश दैत राष्ट्रपति द्रौपदी मुर्मू अपन संबोधनमे कहलनि जे पछिला १० सालमे भारत राष्ट्रहितमे एहन कतेको काज पूरा करैत देखलक अछि, जकर देशक जनता दशकसँ प्रतीक्षा कऽ रहल छल। राम मन्दिर निर्माणक आकांक्षा कतेको सदीसँ छल, जे पूरा भेल।
जम्मू-कश्मीरसँ अनुच्छेद ३७० हटयबाक विषयमे सन्देह छल, जे आइ इतिहास बनि गेल अछि आ ई संसद तीन तलाकक विरुद्ध कठोर कानून बनौलक अछि।
नव संसद भवनमे अपन पहिल संबोधनक उल्लेख करैत राष्ट्रपति मुर्मू कहलनि जे ई भव्य भवन स्वतन्त्रताक अमृत कालक प्रारम्भमे बनाओल गेल अछि। एक भारत श्रेष्ठ भारतक सुगंध सेहो अछि। भारतक सभ्यता आ संस्कृतिक चेतना सेहो अछि। २५ करोड़ देशवासी गरीबी रेखासँ बाहर आबि चुकल छथि ई कहैत ओ कहलनि जे हम सभ बचपनसँ गरीबी हटाओक नारा सुनैत आबि रहल छी। आब अपन जीवनमे पहिल बेर हम पैघ स्तरपर गरीबीक उन्मूलनक साक्षी बनि रहल छी।
केन्द्र सरकारक सुधार, प्रदर्शन आ परिवर्तनक प्रति अपन प्रतिबद्धता जारी रखैत राष्ट्रपति आगू कहलनि जे आइ अर्थव्यवस्थाक विभिन्न आयामकेँ देखैत विश्वास बढ़ैत अछि जे भारत सही दिशामे अछि आ सही निर्णय लऽ कऽ आगू बढ़ि रहल अछि। पछिला दशकमे सरकार सुशासन आ पारदर्शिताकेँ प्रत्येक प्रणालीक मुख्य आधार बनौने अछि। भारतमे व्यवसाय करब लगातार आसान बनाओल जा रहल अछि, इज ऑफ डूइंग बिजनेस अर्थात व्यापार करबाक सुगमतामे लगातार सुधार भऽ रहल अछि।
हम एमएसएमई आ छोट उद्यमीकेँ सशक्त बनयबाक लेल पूर्ण प्रतिबद्धताक संग काज कऽ रहल छी। डिजिटल इंडियाक क्षेत्रमे सबसँ पैघ सुधारक परिणाम भेटि रहल अछि आ आइ दुनियाक कुल रियल टाइम डिजिटल लेनदेनक ४६% भारतमे होइत अछि।
ओ कहलनि जे सरकारक मानब अछि जे विकसित भारतक भव्य भवन ४ टा मजबूत स्तम्भ पर ठाढ़ होयत। ई स्तम्भ युवा शक्ति, महिला शक्ति, किसान आ गरीब अछि। एहि लेल सरकार एहि चारि स्तम्भकेँ मजबूत करबाक लेल निरन्तर काज कऽ रहल अछि। सबका साथ, सबका विकास, सबका विश्वास आ सबका प्रयास केर मंत्र पर चलि रहल सरकार समाजक हर वर्गकेँ उचित अवसर प्रदान करयमे लागल अछि।
आन्तरिक शान्तिक लेल सरकारक प्रयासक सार्थक परिणामक उल्लेख करैत राष्ट्रपति मुर्मू कहलनि जे आतंकवाद हो वा विस्तारवाद, हमर सेना आइ ‘जैसे को तैसा’ नीतिक अन्तर्गत जवाब दऽ रहल अछि। जम्मू-कश्मीरमे आइ सुरक्षाक माहौल अछि। आइ ओतय हड़तालक सन्नाटा नहिं अछि, भीड़-भाड़ वला बजारक हलचल अछि। पूर्वोत्तरमे अलगाववादक घटनामे कमी आयल अछि।
ई दावा करैत जे भारत सरकार वैश्विक विवाद आ संघर्षक समयमे सेहो भारतक हितकेँ दृढ़तासँ दुनियाक सोझाँ रखलक अछि, राष्ट्रपति कहलनि जे सरकार दुनिया भरिमे काज करैवला भारतीयसभमे नव भरोसा जतौलक अछि। ऑपरेशन गंगा, ऑपरेशन कावेरी आ वन्दे भारत सन अभियान चला कऽ जतय संकट आबि गेल, प्रत्येक भारतीयकेँ ओतयसँ जल्दी सुरक्षित वापिस आनल गेल।
