मुजफ्फरपुरक सदर अस्पतालमे आगि लागल, तीनटा शिशु झुलसल, बचाव कार्य जारी

मुजफ्फरपुर समदिया
*

मुजफ्फरपुर सदर अस्पतालमे पुनः लापरवाहीक मामिला सामने आयल अछि। अस्पताल प्रबंधन बस नामक रहि गेल अछि।
मुजफ्फरपुर सदर अस्पतालक एसएनआईसीयू वार्डमे शॉर्ट सर्किटक कारण केन्द्रक नियंत्रण कक्षमे आगि लागि गेल। वार्डमे धुआँ उठैत देखि वार्डमे भर्ती मरीजमे अफरातफरी पसरि मचल। तीनटा शिशु झुलसि जयबाक सूचना छल। हुनका सब के एसकेएमसीएच लए गेल अछि। सदर अस्पतालमे बचाव कार्य चलि रहल अछि। आगि मिझाबय केर प्रयास कएल जा रहल अछि। अस्पतालक कर्मचारी द्वारा अस्पतालमे अग्निशामक उपकरणसँ आगि बुझा देल गेल। झुलसल शिशु सभक हालतक सूचना प्राप्त नहिं भेल अछि। एहेन संभावना अछि जे शहरमे चमकी बोखारक मामिला सभ सामने आयल छल, ताहि क्रममे शिशु सभ भर्ती छल, मुदा ई अलगे घटना भऽ गेल। शिशुक परिजन सभ काफी आक्रोशित छथि आ जांचक मांग कऽ रहल छथि।