कहल जा रहल छल जे प्रधानमंत्रीक चेहराक रूपमे मल्लिकार्जुन खड़गेक नाम आगू रखलाक बाद नीतीश कुमार नाराज छलाह। मुदा, ओ हरदम एहि बातक खण्डन करैत रहलाह। आब इंडिया गठबंधनक संयोजकक रूपमे नीतीश कुमारक नाम हवामे अछि। राज्यसभा सांसद मनोज झा एकटा पैघ बयान देलनि आ मानू गर्जना करैत कहलनि अछि जे संयोजकक दृष्टिसँ नीतीश कुमार उचित चेहरा छथि, हिनकासँ अधिक योग्य कियो नहिं। सभ जनैत छी जे झा राजदक पैघ नेता ओ राज्य सभा सांसद छथि।
मनोज झा कहलनि अछि जे मात्र ओ नहि बल्कि राजद सेहो मानैत अछि जे इंडिया गठबंधनक संयोजक बनबाक लेल नीतीश कुमारसँ नीक कियो नहिं अछि।
राज्यसभा सांसद झा कहलनि अछि जे राजद अपन जन्मसँ भाजपाक विरुद्ध लड़ि रहल अछि आ भाजपा राजदसँ राजनीतिक रूपसँ नहिं लड़ि सकैत अछि, तेँ ओ जाँच एजेंसीक सहारा लैत अछि। मनोज झा एकरा अमित शाहक चाल, चरित्र आ चेहरा कहलनि अछि।
मनोज झा इहो कहलनि, “केंद्र सरकारक किछु अधिकारी हमरा संपर्कमे छथि आ अधिकारी सब कहलनि जे चुनाव तक अहाँ सबकेँ भ्रमित रखबाक निर्देश अछि, ताहि लेल तेजस्वी यादव के निशाना बनायल जा रहल अछि।”
मनोज झा दावा कयलनि जे भारतीय जनता पार्टी विरोधी नेताकेँ उठयबाक अभियान शुरू करय जा रहल अछि आ ई काल्हिसँ शुरू होयत। झा चेतावनीवला स्वरमे कहलनि जे ओ आ हुनकर पार्टी भाजपाक एहि रणनीति सँ लड़बाक लेल तैयार छथि। मनोज झा नीतीश कुमारकेँ इंडिया गठबंधनक संयोजक पदक लेल सबसँ उपयुक्त चेहरा बतौलनि।
ओतहि जनता दल यूनाइटेड (जेडीयू)क प्रवक्ता नीरज कुमार कहैत छथि जे संयोजकक संबंधमे कोनो निर्णय इंडिया गठबन्धन मिलिकऽ लेत। नीरज कुमार कहलनि अछि जे यद्यपि नीतीश कुमार सदैव कहैत आबि रहल छथि जे हुनका कोनो पदक इच्छा नहिं अछि, मुदा पार्टी शुरूसँ मानैत आबि रहल अछि जे नीतीश कुमार देशक सार्वभौमिक मान्यता प्राप्त आ सक्षम नेता छथि।
