संसद परिसरमे साधु-वेश धारण कए प्रदर्शन पर विवाद, संत समाज जतौलनि आपत्ति
अखिल भारतीय संत समितिक लोकसभा अध्यक्षसँ कार्रवाईक मांग, विपक्ष पर संत परंपरा आ भगवा वेशभूषाक अपमानक आरोप
नई दिल्ली । समदिया
संसद भवनक मकर द्वार पर राम मंदिरक कथित चढ़ावा चोरीक मुद्दा लऽ विपक्ष द्वारा कएल गेल प्रतीकात्मक प्रदर्शन पर नव विवाद उत्पन्न भऽ गेल अछि। अखिल भारतीय संत समितिक महामंत्री जितेंद्रानंद सरस्वती एहि प्रदर्शन पर कड़ा आपत्ति जतबैत एकरा साधु-संत समाज आ भगवा वेशभूषाक अपमान कहलनि। ओ लोकसभा अध्यक्षसँ एहि घटनाक्रमक संज्ञान लऽ उचित कार्रवाई करबाक मांग सेहो कयलनि।
जानकारी अनुसार, विपक्षी सांसदसभ राम मंदिरमे कथित चढ़ावा चोरीक मुद्दा उठबैत संसद परिसरमे प्रदर्शन कयलनि। एहि दौरान सांसद पप्पू यादव भगवा वस्त्र धारण कए प्रतीकात्मक रूपसँ चढ़ावा बटोरैत देखल गेलाह। नेता प्रतिपक्ष राहुल गांधी सहित आन विपक्षी सांसदसभ प्रतीकात्मक रूपसँ चढ़ावा अर्पित करैत प्रदर्शनमे सहभागी बनलाह।
जितेंद्रानंद सरस्वती कहलनि जे कोनो राजनीतिक दलकेँ सरकार अथवा सत्तारूढ़ दलक विरोध करबाक लोकतांत्रिक अधिकार अछि, मुदा साधु-संतक वेशभूषाक प्रयोग कए समूचा संत समाज पर चोरीक आरोपक संदेश देब अनुचित आ दुर्भाग्यपूर्ण अछि। हुनकर अनुसार, एहि प्रकारक प्रदर्शनसँ संत परंपरा आ भगवा वस्त्रक गरिमाकेँ ठेस पहुँचल अछि।
ओ कहलनि जे यदि विपक्ष बिना शर्त सार्वजनिक रूपसँ माफी नहि मांगैत अछि, तँ लोकसभा अध्यक्षकेँ एहि विषयमे हस्तक्षेप कए आवश्यक कार्रवाई करबाक चाही। संगहि ओ स्पष्ट कएलनि जे राम मंदिरसँ संबंधित कथित चढ़ावा चोरी प्रकरणक जांच सक्षम एजेंसीसभ कए रहल अछि आ जे कानूनी निष्कर्ष सामने आएत, संत समाज ओकर सम्मान करत। दोषी पाओल जाएबला लोकसभ पर कड़ा कार्रवाई करबाक मांग सेहो हुनका द्वारा दोहराओल गेल।
एहि बीच भाजपा सांसद साक्षी महाराज सेहो विपक्षक प्रदर्शनक आलोचना कयलनि। हुनकर आरोप छल जे कांग्रेस आ विपक्ष लगातार संत समाज, भगवा आ सनातन परंपराक अपमान करैत आबि रहल अछि। ओ कहलनि जे भगवान राम आ चढ़ावाक विषयकेँ राजनीतिक प्रदर्शनक माध्यम बनबैत सनातन परंपराक अपमान कएल गेल अछि। लोकसभा अध्यक्षसँ एहि घटनाक्रम पर उचित कार्रवाई करबाक मांग सेहो हुनका द्वारा कएल गेल।
विपक्षक प्रदर्शन आ संत समाजक प्रतिक्रियाक बाद एहि मुद्दा पर राजनीतिक बहस आरो तेज भऽ गेल अछि।
