चुनाव आयोग द्वारा अजित पवारक राष्ट्रवादी कांग्रेस पार्टीकेँ असली एनसीपी घोषित कयलाक बाद राजनीतिक हंगामा भेल अछि। कियो अजित पवारकेँ एनसीपीक नाम आ चुनाव चिन्ह ‘घड़ी’ देबय केर निर्णयकेँ सही कहि रहल अछि, तऽ कियो गलत। किछु गोटे शरद पवारकेँ उच्च न्यायालयमे जयबाक सलाह देलनि अछि, तऽ कियो कहलकनि दृढ़तासँ लड़ू।
महाराष्ट्र भाजपा सांसद गोपाल शेट्टी कहलनि, “जँ केकरो चुनाव आयोगक निर्णय गलत लगैत अछि तखन ओ उच्च न्यायालय वा सर्वोच्च न्यायालयमे जा सकैत अछि। जँ शरद पवारकेँ गलत बुझाइत अछि तऽ ओ कोर्ट जा सकैत छथि।”
भाजपा नेता आ केन्द्रीय मंत्री डॉ.भागवत किशनराव कराड चुनाव आयोगक निर्णयकेँ उचित ठहरौलनि आ कहलनि “हम एहि निर्णयकेँ स्वागत करैत छी। जँ हुनका (शरद पवार) लगैत अछि जे अन्याय भेल अछि तखन ओ अदालतमे जा सकैत छथि।”
शिवसेना (यूबीटी) सांसद प्रियंका चतुर्वेदी कहलनि, “देशमे एहन माहौल बनि गेल अछि, जे पैसा ‘फेंकू तमाशा देखू’ । जे आम लोकक पाइक बर्बादी अछि। जे विधायक आ सांसदक रूपमे आबि रहल छथि, हुनक खरीद-फरोख्त भऽ रहल अछि। ई केंद्रक सहमतिसँ भऽ रहल अछि। ई सब देशक समक्ष स्पष्ट होइत जा रहल अछि। ई लड़ाई लम्बा अछि। ई संविधानक लड़ाई अछि। शिवसेना संवैधानिक रूपसँ लड़ि रहल अछि। हमरा विश्वास अछि जे शरद पवार साहेब, जे एकटा अनुभवी नेता छथि, डटि कय लड़ताह।”
छह माससँ बेसी समय धरि चलल, १०सँ बेसी सुनवाईक बाद चुनाव आयोग एनसीपीमे विवादक निपटारा कयलक आ अजित पवारक नेतृत्ववला गुटक पक्षमे फैसला देलक। आब एनसीपीक नाम आ चुनाव चिन्ह ‘घड़ी’ अजित पवार लग रहत। महाराष्ट्रक उपमुख्यमंत्री अजित पवार मंगलदिन कहने छलाह जे हमरा नेतृत्वमे एनसीपीकेँ राज्यक अधिकांश विधायकक सङ्ग-सङ्ग जिला अध्यक्षक समर्थन सेहो प्राप्त अछि।
