कॉलेज कैंपस खूनसँ लाल, बीए छात्रक सरेआम हत्या

मोतिहारी। समदिया

काल्हि सोमदिन बिहारक मोतिहारीसँ एकटा सनसनीखेज घटना सामने आयल, जाहिसँ पूरा शिक्षा व्यवस्था आओर सुरक्षा व्यवस्था पर गंभीर सवाल उठल अछि। पूर्वी चंपारण जिलाक कोटवा थाना क्षेत्रमे स्थित एकेआरआर महाविद्यालय, कोटवामे बीए थर्ड ईयरक परीक्षा द कय बाहर निकलि रहल एक छात्र केर सरेआम चाकू मारि कय हत्या कय देलनि। घटना ओहि  समय भेल जखनि कॉलेज परिसर छात्रसँ खचाखच भरल छल। दर्जनों छात्र-छात्राक सामने आरोपी युवक लगातार छात्र पर चाकुसँ हमला करैत रहल, मुदा भय आ दहशतक कारण कोनो बीच-बचाव करबाक हिम्मत नहि जुटा सकल।

मृतक छात्रक पहिचान कल्याणपुर थाना क्षेत्रक देवपुर परसा गांव निवासी रितेश कुमारक रूपमे कयल गेल अछि। खबरि अछि कि रितेश सोशल मीडिया पर बहुत सक्रिय छल आ एही क्षेत्रमे सोशल मीडिया इन्फ्लुएंसर केर रूपमे जानल जायत छल। ओ सोमदिन बीए पार्ट-3 परीक्षा देलाक बाद कॉलेज परिसरसँ बाहर निकलैत काल ओही गामक निवासी सरोज यादव पहिनेसँ इंतजारमे छल।

प्रत्यक्षदर्शीक अनुसार आरोपी पहिने रितेशकेँ रोकलक आ फेर अचानक चाकू निकालि ओकरा पर हमला करय लागल। छात्र जान बचाबय लेल दौड़ल, मुदा आरोपी ओकर पीछा कयलक आ कतेको बेर चाकू मारलक। किछु क्षणमे कॉलेज कैंपसमे चीख-पुकार आ भगदड़ मचि गेल। खूनसँ लथपथ रितेश जमीन पर खसि पड़ल आ मौका पर ओकर मृत्यु भ गेल। घटनाक बाद आरोपी मौकासँ फरार भ गेल।

सूचना भेटला पर कोटवा पुलिस भारी संख्यामे दल-बल संग पहुंचल आ कॉलेज परिसर पर अपन नियंत्रण कय लेलक। पुलिस लाश केर पोस्टमार्टमक लेल सदर अस्पताल पठा देलक अछि। एहि घटनाक बाद कॉलेजमे दहशतक माहौल बनल छल, जाहिमे छात्र आ स्थानीय निवासीमे व्यापक आक्रोश छल।

पुलिसक प्रारंभिक जांचमे सोशल मीडिया आ यूट्यूब वीडियो अपलोडकेँ ल कय विवादक संकेत भेटल अछि। खबरि अछि  कि पिछला किछु दिनसँ मृतक आ आरोपीक बीच तनाव पैदा भ रहल छल। मुदा पुलिस एहि मामिला केर सभ एंगलसँ जांच कय रहल अछि आओर हत्याक पाछुक असली मकसद केर पता लगाबयक कोशिशमे अछि। घटनाक जानकारी भेटला पर मृतकक परिवार सदर अस्पताल पहुंचल, जतय परिजन सभक कानि कानि कय हाल बेहाल छल।

परिवार आरोपीक तत्काल गिरफ्तारी आ कठोर सजाक मांग कयलक अछि। स्थानीय विधायक सचिन्द्र सिंह सेहो एहि घटना पर गहींर शोक व्यक्त करैत अपराधी पर सख्त कार्यवाही करबाक बात कयलनि। फिलहाल पुलिस आरोपी सरोज यादव केर गिरफ्तार करय लेल लगातार छापामारी कय रहल अछि। एहि सनसनीखेज हत्याक बाद पूरा मोतिहारी इलाकामे दहशत आ तनावक माहौल समाचार सम्प्रेषण धरि बनल छल।