सीएम सम्राटक दरभंगामे एम्स आ एयरपोर्ट पर फोकस, भेल परियोजनाक समीक्षा

दरभंगा । समदिया

दरभंगामे बृहस्पतिकेँ बिहारक मुख्यमंत्री सम्राट चौधरीक दौरा कतेको दृष्टिकोणसँ महत्वपूर्ण मानल गेल। मुख्यमंत्री प्रातः दरभंगा एयरपोर्ट पहुँचला, जतय भाजपा आ जेडीयू नेता सभ पारंपरिक मिथिला शैलीमे हुनकर स्वागत कयलनि।

एयरपोर्ट पर सुरक्षा व्यवस्था, नव टर्मिनल भवन आ एम्स निर्माण कार्यक समीक्षा एहि दौराक मुख्य उद्देश्य रहल। एहि दौरान भाजपा प्रदेश अध्यक्ष संजय सरावगी, सांसद डॉ. गोपाल जी ठाकुर, विधायक डॉ. मुरारी मोहन आ जेडीयू नेता संजय झा उपस्थित छलाह। मुख्यमंत्री अधिकारी सभ संग बैठक कऽ विकास परियोजनाक प्रगति पर विस्तारसँ जानकारी लेलनि।

दरभंगा एयरपोर्ट पर मुख्यमंत्रीक पहुँचला पर पारंपरिक पाग, चादर आ मखानक मालासँ हुनकर अभिनंदन कएल गेल। एयरपोर्ट परिसरमे बहुत रास पार्टी कार्यकर्ता आ स्थानीय लोक उपस्थित छलाह। स्वागत कार्यक्रमक बाद मुख्यमंत्री सिधा एयरपोर्टक सुरक्षा क्षेत्रमे पहुँचला आ ओतय केर मौजूदा व्यवस्थाक निरीक्षण कएलाह। अधिकारी सभ हुनका यात्रीक बढ़ैत संख्या आ सुरक्षा संबंधित तैयारीक जानकारी देलनि।

मुख्यमंत्री एयरपोर्ट सुरक्षाक बारेमे अधिकारी सभक संग अलग समीक्षा बैठक कयलथि। एहि दरम्यान एयरपोर्टक सुरक्षा व्यवस्था केंद्रीय औद्योगिक सुरक्षा बल यानी CISF केर सौंपबाक प्रस्ताव पर चर्चा भेल। सुरक्षा एजेंसी सभक अधिकारी सभ एयरपोर्टक संवेदनशीलता आ भविष्यक आवश्यकता सभक बारेमे प्रस्तुति देलथि। एहि बीच CISF जवान सभ मुख्यमंत्रीकेँ गार्ड ऑफ ऑनर देलनि। मुख्यमंत्री साफ कहलनि कि यात्री लोकनिक सुरक्षामे कोनो तरहक लापरवाही नहिं होयबाक चाही।

दरभंगा एयरपोर्टक नव टर्मिनल भवन सेहो मुख्यमंत्रीक एजेंडामे प्रमुखतासँ शामिल रहल। अधिकारी सभ निर्माण कार्यक वर्तमान स्थिति आ संभावित समय सीमाक जानकारी देलनि। मुख्यमंत्री निर्माण एजेंसी सभकेँ निर्देश देलथि जे तय समयक भीतर परियोजना पूरा हेबाक चाही। ओ कहलनि कि उत्तर बिहारमे हवाई सेवाक बढ़ैत मांग केर देखैत आधुनिक सुविधासँ भरल टर्मिनल आवश्यक अछि।

AIIMS दरभंगा परियोजना केर समीक्षा सेहो एहि दौराक महत्वपूर्ण हिस्सा रहल। मुख्यमंत्री स्वास्थ्य विभाग आ निर्माण एजेंसी सभसँ निर्माण कार्यक प्रगतिक रिपोर्ट मांगलथि।

एयरपोर्ट परिसरमे आयोजित कार्यक्रममे मुख्यमंत्री दीप प्रज्वलित क’ समारोहक शुरुआत कएलनि। कार्यक्रमक दौरान स्थानीय जनप्रतिनिधि आ प्रशासनिक अधिकारी सब क्षेत्रक जरूरत आ लंबित योजना सभक जानकारी देलनि। मुख्यमंत्री कहला जे मिथिला क्षेत्रक विकास राज्य सरकारक प्राथमिकतामे शामिल अछि आ दरभंगाकेँ स्वास्थ्य, शिक्षा आ कनेक्टिविटीक पैघ केंद्रक रूपमे विकसित करबाक दिशामे लगातार काज कएल जा रहल अछि।