गूगल द्वारा अपन प्ले स्टोरसँ किछु ऐप हटयबाक खिलाफ कड़ा रुख अपनाबैत सरकार शनिदिन कहलक जे भारतीय ऐप केर हटाबय केर अनुमति नहिं देल जा सकैत अछि। सरकार एहि संबंधमे अगिला सप्ताह एकटा बैसारक लेल गूगल आ सम्बन्धित स्टार्टअपकेँ बजौलक अछि। सूचना प्रौद्योगिकी आ दूरसंचार मंत्री अश्विनी वैष्णव एकटा साक्षात्कारमे कहलनि जे स्टार्टअप पारिस्थितिकी तंत्र भारतीय अर्थव्यवस्थाक कुंजी अछि आ ओकर भाग्य कोनो पैघ प्रौद्योगिकी कंपनी पर नहि छोड़ल जा सकैत अछि। मंत्रीक टिप्पणी एहि लेल महत्वपूर्ण अछि किएक तँ गूगल शुक्रदिन भारतमे अपन प्ले स्टोरसँ एकटा लोकप्रिय ऐप ‘मैट्रिमोनी’ सहित किछु एपकेँ भुगतान कयल गेल सेवा शुल्कक विवादक कारण हटाबय लागल। ई ऐप आ सुप्रसिद्ध स्टार्टअप संस्थापकसभ एहि पर आपत्ति जतौने छलाह।
वैष्णव एहि मुद्दापर गम्भीरतासँ विचार करैत कहलनि, “भारत सरकारक नीति बहुत स्पष्ट अछि… हमर स्टार्टअप केर ओ सुरक्षा भेटत जकर ओकरा जरूरत अछि। मंत्री कहलनि जे सरकार अगिला सप्ताह गूगल आ प्ले स्टोरसँ हटायल गेल ऐपक डेवलपरसँ भेंट कऽ विवादक समाधान करत। “हम पहिनेसँ गूगलसँ बात कए चुकल छी… हम एप डेवलपरसँ सेहो बात केलहुं जिनका हटा देल गेल अछि। हम अगिला सप्ताह हुनकासं भेंट करब। एप केर हटाबै केर अनुमति एहि तरहेँ नहिं देल जा सकैत अछि। ओ कहलनि जे भारत १० सालमे एक लाखसँ बेसी स्टार्टअप आ १०० सँ बेसी यूनिकॉर्नक एकटा मजबूत स्टार्टअप पारिस्थितिकी तंत्रक निर्माण कयलक अछि। मंत्री कहलखिन, “युवा आ उद्यमक ऊर्जाकेँ प्रवाहित करबाक अछि आ एकरा पैघ तकनीकी कम्पनीसभक नीतिक दया पर नहिं छोड़ल जा सकैत अछि।”
गूगल शुक्रदिन कहलक जे कतेको जानल-मानल फर्म सहित कंपनी सभ ओकर बिलिंग मानदंडक उल्लंघन कऽ रहल अछि। ई कंपनी बिक्री पर लागू प्ले स्टोर सेवा शुल्क नहिं दऽ रहल अछि। एकर सङ्गहि गूगल चेतौनी देने छल जे ओ गूगल प्ले पर एहन गैर-अनुपालन एपकेँ हटयबामे संकोच नहिं करत। गूगल कहलक जे एहि डेवलपरसभकेँ तैयारी लेल तीन सालसँ बेसी समय देल गेल छल। एहिमे सर्वोच्च न्यायालयक आदेशक बाद देल गेल तीन सप्ताहक समय सम्मिलित अछि।
गूगल कहलक जे एकर बाद आब ओ ई सुनिश्चित करबाक लेल आवश्यक कदम उठा रहल अछि जे ओकर नीति सभ पर समान रूपसँ लागू हो। कंपनी कहलक जे आवश्यकता पड़ला पर गूगल प्लेसँ गैर-अनुपालन एपकेँ हटायल जा सकैत अछि। शुक्रदिन प्ले स्टोर पर Shaadi.com, Matrimony.com, भारत मैट्रिमोनी, बालाजी टेलीफिल्म्सक ऑल्ट (पहिने एएलटी बालाजी), ऑडियो प्लेटफॉर्म कुकू एफएम, डेटिंग सेवा क्वेक क्वैक आ ट्रूली मैडली सन ऐप नहिं भेटल। इंफो एज बतौलक जे ओकर ऐपकेँ सेहो प्ले स्टोरसँ हटा देल गेल अछि।
