मैथिल शिक्षाविद सह मैथिली अभियानी दिलीप कुमार चौधरी सीबीएसई स्कूलक छात्र छात्रा केर मैथिली भाषामे संबोधित करैत संविधान निर्माणक सारगर्भित बात बतौलनि। एहि अवसर पर छात्र सभकेँ भारतीय संविधानक संबंधमे जानकारी देल गेल आ कहल गेल जे भारतीय संविधान अंग्रेज शासनक खिलाफ लंबा संघर्षक परिणाम अछि। ई संविधान अलग-अलग जानकार आ अनुभवी लोक द्वारा लिखल गेल, जाहिमे समूह, जाति, विभिन्न क्षेत्रक लोकक व्यापक सोचक परिणाम थिक। संविधानक महत्व बतबैत ओ आगू कहलनि जे भारतक संविधान सर्वोच्च कानून अछि । १९२० मे भारतीय राष्ट्रीय कांग्रेस भारतक जनतासँ अपन संविधान बनेबाक स्पष्ट मांग कयलक । १९३१ मे कांग्रेस सत्रमे भारतीय संविधानक रूपरेखासँ संबंधित एकटा प्रस्ताव पेश कयल गेल। एहि प्रस्तावमे किछु मूलभूत मूल्य जेना सार्वभौमिक वयस्क मताधिकार, स्वतंत्रता आ समानताक अधिकार, संसदीय आ जिम्मेदार सरकारक संग-संग विपन्न लोकक अधिकारक रक्षा सेहो शामिल छल।१९३९ मे ब्रिटिश सरकार नव भारतीयक एहि मांगकेँ खारिज कय देलक मुदा ओही वर्ष १९४० मे इंग्लैंड केर बहुदलीय सरकार एहि मांग केर स्वीकार केलक आ भारतीयकेँ अपन दम पर भारतीय संविधान बनेबाक अधिकार देलक। १९४६ मे कैबिनेट मिशन केर तहत संविधान सभाक गठन भेल।संविधान बनेबा मे २ वर्ष ११ महिना आ १८ दिन लागल ।दुनियाक सबसँ पैघ लिखित संविधान २६ नवम्बर १९४९ केँ अपनाओल गेल आ २६ जनवरी १९५० केँ लागू कयल गेल । एकटा रोचक जानकारी दैत श्री चौधरी आगू कहलनि जे जखन संविधान तैयार भेल तखन संविधानक मूल प्रति पर डॉ. सच्चिदानंद सिन्हा केर हस्ताक्षर रहब जरूरी छल मुदा हुनकर अस्वस्थता केर ध्यानमे राखि संविधानक प्रतिलिपि हवाई जहाजसँ बिहार आनल गेल आ फेर ओ हस्ताक्षर केलथि। संविधान निर्माणमे उल्लेखनीय योगदान देनिहार लोकसभ छथि :- डॉ. बी.आर.अम्बेडकर, डॉ. राजेन्द्र प्रसाद, पं. जवाहरलाल नेहरू, सरदार पटेल, पं. स्यामा प्रसाद मुखर्जी, तेज बहादुर सपरू, एम.एन.राय, अबुल कलाम आजाद, के.एम.मुंशी, टी.टी.कृष्णमचारी, एच.सी.मुखर्जी, सोमनाथ लाहिरी एवं दरभंगा महाराज कामेश्वर सिंह ठाकुरक नाम उल्लेखनीय अछि। विद्यालय प्रबंधन केर तरफसँ रविन्द्र कुमार, लाल बहादुर, अनीश, रोहित आ शिक्षक सभ गणतंत्र दिवसक विस्तृत जानकारीक लेल चौधरीक प्रति आभार व्यक्त केलनि आ छात्र पीयूष, आर्य, आयुष, पूनम, सृष्टि कुमारी, सम्या, सृष्टि प्रिया, रागिनी आ सुष्मिता संविधानक बारेमे विस्तृत जानकारी देला पर खुशी व्यक्त केलनि।
