बिहारमे निडर अपराधी एकटा आओर घटना कयलक अछि। पुलिस आइ कहलक जे कटिहार जिलामे सशस्त्र हमलावर द्वारा भाजपा विधायक कविता देवीक भतीजाक गोली मारि हत्या कऽ देल गेल।
मिथिला क्षेत्रीय बिहारक कटिहार जिलामे बुधदिन अज्ञात हमलावर द्वारा भाजपा विधायक कविता देवीक भतीजाक गोली मारि हत्या कऽ देल गेल। मृतकक पहिचान कटिहारक कोरहा विधानसभा सीटसँ भाजपा विधायक कविता देवीक भतीजा नीरज पासवान (३५) केर रूपमे भेल अछि। मुदा, पुलिस एकटा हमलावरकेँ पकड़बामे सफल रहल आ ओकर कब्जासँ चारिटा आग्नेयास्त्र बरामद कयलक।
कटिहारक पुलिस अधीक्षक जितेन्द्र कुमार बतौलनि, “नीरज पासवान पर बुधदिन राति लगभग आठ बजे कटिहार नगर थाना क्षेत्रक संतोषी क्षेत्रमे हुनक घरसँ किछु मीटर दूर किछु हथियारबंद हमलावर हमला कयलक। पासवान पर गोली चलयलाक तुरन्त बाद हमलावर भागि गेल। मुदा, हमलावरमेसँ एकटाकेँ स्थानीय पुलिसकर्मी आ क्षेत्रवासी पकड़ि लेलक आ ओकर कब्जासँ चारिटा आग्नेयास्त्र बरामद कयल गेल।
पासवानकेँ लगक सरकारी अस्पताल लऽ जायल गेल, जतय हुनका मृत घोषित कऽ देल गेल। एसपी कहलनि जे स्थानीय पुलिस एहि मामिलाक जाँच कऽ रहल अछि आ आन आरोपीकेँ पकड़बाक लेल छापा मारल गेल अछि। एकटा स्थानीय पुलिस अधिकारी, जे नाम उजागर नहिं करबाक शर्त पर कहलनि जे पासवान कथित रूपसँ एकटा हत्याक मामिलामे आरोपी छलाह। हालमे हुनका जमानत भेटल छल।
