दरभंगा जिलाक कमतौल थाना क्षेत्रक लाधा गाममे स्थित एफसीआई गोदाम पर पुलिस शनिदिन देर राति छापा मारलक आ पैघ पैमाना पर सरकारी अनाजक कालाबाजारीक खुलासा कयलक। एसडीपीओ २ ज्योति कुमारीक नेतृत्वमे पुलिस ६ ट्रक जब्त कयलक जे गरीबक लेल आवंटित खाद्यान्नसँ भरल छल। एम्हर पुलिस एहि अवैध गतिविधिमे शामिल दूटा लोककेँ गिरफ्तार कयलक अछि।
छापामारीक दौरान पुलिसकेँ सूचना भेटल जे अनाज गोदामसँ साइकिल आ स्कूटीक माध्यमसँ ढाबा धरि पहुँचाओल जा रहल अछि। जाँचमे पता चलल जे अनाजकेँ दोसर बोरामे पैक कऽ ओकर पहिचान बदलबाक प्रयास कयल जा रहल अछि। पुलिस घटनास्थलसँ २६ बोरा सरकारी गहूम बरामद कयलक। जाहिमेसँ ७ बोरा सील पैक छल जखन कि शेष बैग बदलि देल गेल छल।
तलाशीक दौरान पुलिस ढाबा सs चाकू, तलवार, शराबक बोतल आ गांजा सेहो बरामद कयलक। पुलिस जाँचमे इहो पता चलल अछि जे एहि काला बाजारमे एकटा राशन डीलर शामिल अछि। जे गरीब जनताक लेल निर्धारित अनाज काला बाजारमे बेचि रहल छल। एहिसँ पहिने लहेरियासरायमे सरकारी अनाजक कालाबाजारी होयबाक मामिला सामने आयल छल। बेर-बेर एहेन घटना प्रशासनक कार्यप्रणाली पर सेहो प्रश्न उठा रहल अछि।
